“Real” “Atletiko”ning 26 ta o‘yindan iborat mag‘lubiyatsiz seriyasiga nuqta qo‘ydi

Madridning “Real” jamoasi La Liga 13-turi doirasida 12-dekabr, shanba kuni hamshahari “Atletiko”ni mag‘lubiyatga uchratdi (2:0).

Shu tariqa “Atletiko”ning Ispaniya chempionatidagi mag‘lubiyatsiz seriyasi o‘z yakuniga yetdi. “Matraschilar” ketma-ket 26 o‘yindan buyon yutqazmay kelayotgandi. “Atletiko” mazkur seriya doirasida 17 ta bahsni yutdi va 9 bor durang o‘ynadi.

So‘nggi bor Diyego Simeone qo‘l ostidagi jamoa Ispaniya chempionatida 2020-yilning fevralida mag‘lubiyatga uchragandi. O‘shanda ham jamoa aynan “Real”ga mag‘lub bo‘lgandi (0:1).

“Atletiko” La Ligada 2016-yildan buyon hamshaharini mag‘lub etolmayapti. So‘nggi bor Simeone jamoasi 2016-yilning 27-fevralida “Real”dan ustun kelgandi (1:0). Shundan beri “qaymoqranglilar” La Ligadagi derbida 4 marta g‘alaba qozonib, 5 bor durang qayd etdi.

“Real” 23 ochko bilan 3-o‘rinda bormoqda, “Atletiko” (26) esa hamon peshqadamlikni saqlab turibdi.