Мўжазгина уй, машиналар ва кўп қиррали инсон. «Боруссия Д»нинг «биллур оёқли» афсонаси Марко Ройс қандай ҳаёт кечиради?

Юлдузларни етиштириб, уларни бошқа клубларга катта пулга сотадиган Дортмунднинг «Боруссия» клубини барча яхши билади. Айнан ушбу клубдан жуда кўплаб юлдуз даражасидаги футболчилар етишиб чиққан ва чиқмоқда. Роберт Левандовски, Пьер-Эмерик Обамеянг, Генрих Мхитарян, Марио Гётце, Жейдон Санчо ва Эрлинг Ҳоланд, шулар жумласидандир. Бироқ «арилар» таркибида шундай футболчи борки, у узоқ йиллардан бери жамоага содиқ (бунга қайсидир маънода унинг жароҳатлари ҳам сабабчи) қолмоқда. Ҳа, бу Марко Ройс. Тез-тез жароҳат олиши туфайли «биллур оёқ» соҳиби номини олган Ройс «Боруссия»нинг афсонаси ҳисобланади. Хўш, Дортмунд афсонаси қаерда яшайди, қандай машиналарда юради футболдан бўш вақтларида нималар билан шуғулланади? Қуйида ушбу саволларга жавоб бериб ўтамиз.

Қаерда яшайди

Марконинг қимматбаҳо уйлари ёки шунга ўхшаш ҳашаматли виллалари йўқ. У Дортмунд клубининг ёшлар жамоасида ўйнаган вақтида сотиб олган хонадонда яшайди. Турар жой «Боруссия» стадионидан атиги 15 дақиқалик масофада жойлашган. Уй бир неча оилага мўлжалланган уч қаватли бинода жойлашган.

Уй енгил рангларда бўялган бўлиб, мебеллар ҳам шунга яраша танланган. Футболчининг айтишича, бу уни қийин ўйинлардан сўнг тинчлантиради.

Ройснинг машиналари

Марко Ройснинг гаражидан бир қанча машиналар ўрин олган. Хусусан, Opel Аdam (10 минг евро), Range Rover (65 минг евро), Aston Martin Vanquish (300 минг евро) машиналари.

Шахсий ҳаёти

Марко Ройс 2015 йилдан бери Скарлет Ҳартманн исмли модель қиз билан яқин муносабатларда. 2019 йилда жуфтлик қиз фарзандли бўлишига қарамай, улар ҳамон муносабатларини расмийлаштирганича йўқ.

Дўстлари ким?

Ройснинг ҳаётида бир қанча яхши дўстлар бор, лекин унинг энг садоқатли ва яқин дўсти бу Марио Гётце.

Ройс ва Гётце «Боруссия» академиясида тарбияланган, аммо улар турли ёш тоифаларида шуғуллангани учун фақатгина 2009 йилда, Германия терма жамоаси йиғинида танишган. Футболчилар дўстлигининг энг таъсирли эпизоди, 2014 йилги Бразилияда ўтказилган Жаҳон чемпионатининг финал учрашувида содир бўлган. Ройс ўша пайтдаги Германия терма жамоасининг етакчиларидан бирига айланиши керак эди, аммо у сўнгги паллада жиддий жароҳат олади ва мундиалга йўл олмайди. Марио эса Аргентинага қарши кечган ўйинда ҳал қилувчи голни урди ва финал ҳуштагидан сўнг майдонга Марконинг исми туширилган либосни олиб чиқади.

Шунингдек, Марко Мануэль Аканжи ва 2013–2018 йилларда «Боруссия»да ўйнаган Пьер-Эмерик Обамеянг билан ҳам яхши муносабатларга эга.

Футболдан ташқари қизиқишлар

Ройс кўп қиррали одам бўлиб, футболдан ташқари стол тенниси ва PlayStation ўйнашни ҳамда мусиқа тинглашни яхши кўради. Бундан ташқари у Hot Wheels номли ўйинчоқ машиналарини ишлаб чиқаришда иштирок этади. Шу билан бирга Марко хайрия ишларини ҳам унутмайди ва ҳаётда омади чопмаганларга ёрдам бериб келади. Футболчи бир неча йиллардан буён Дортмунддаги касалхоналарда оққон билан курашаётган болаларни доимий равишда қўллаб-қувватлаб келади.

Даромади

Ройс «Боруссия»нинг энг юқори маош олувчи футболчиларидан бири ҳисобланади. Марко 2023 йилнинг 30 июнига қадар мўлжалланган шартномага кўра, йилига 10 миллион евро маош олади.

Бундан ташқари, Puma компанияси билан имзоланган шартномага асосан, футболчи йилига яна 2 миллион евро қўшимча  даромад кўради. Бундан ташқари, у телевизион шартномаларда ҳам иштирок этиб туради.