Ijtimoiy tarmoqlarda “Jizzax Real qurilish ta’mir” MChJ direktori Shuhrat Sotvoldiyev imzolagan xat surati tarqaldi. Xatda tadbirkor Prezident topshirig‘i va bosh vazirning birinchi o‘rinbosari Ochilboy Ramatov tasdiqlagan hujjatga ishonib, Yoshlar ittifoqi uchun Jizzax viloyatida 14,3 milliard so‘mlik binoni deyarli o‘z hisobidan qurgani qayd etilgan. Bu haqda “Gazeta.uz” xabar berdi.
“Shundan salkam 9 milliard so‘mini hali olganim yo‘q. Yoshlar ittifoqining rahbarlari meni bir yarim yildan beri sarson qilib, adoyi tamom qildi. Bor-budimdan ayrilish arafasida turibman. O‘zimni o‘ldirish darajasiga yetib keldim. 15-dekabr kuni tongda O‘zbekiston Yoshlar ittifoqi Markaziy kengashi binosi oldida ochlik e’lon qilaman. Ittifoq pulimni so‘nggi tiyinigacha bermagunicha ovqat ham yemayman, suv ham ichmayman. Mening ortimda turgan 300 dan ortiq oila haqqi-hurmati bu nohaqliklardan o‘limga ham tayyorman”, — deyiladi xatda.
O‘zbekiston Yoshlar ittifoqi mazkur masala yuzasidan munosabat bildirdi. Unda qayd etilishicha, qarzning bir qismi to‘lab berilgan.
“Shu kunga qadar ‘Yoshlar qurilish invest’ MChJning ‘Jizzax Real qurilish ta’mir’ MChJ oldidagi qarzdorligining jami 7,9 milliard so‘m qismi O‘zbekiston Yoshlar ittifoqi tomonidan qoplab berildi. Yana 1,5 milliard so‘m qismi esa Jizzax viloyati hokimligi tomonidan ajratildi (02.12.2020 holatiga ko‘ra). ‘Yoshlar qurilish invest’ning quruvchi oldidagi jami qarzdorligining 9,4 milliard so‘m qismi qoplandi (bir oy oldin 5,6 milliard so‘m edi)”, — deyiladi xabarda.
Shuningdek, ittifoq bunga qadar tegishli mutaxassislar ishtirokida “Yoshlar qurilish invest” faoliyati bo‘yicha o‘rganish o‘tkazilganini ma’lum qilgan. Ta’kidlanishicha, audit tekshiruvi natijasida qator moliyaviy kamchiliklar aniqlangan va ular bo‘yicha MChJ mas’ul xodimlaridan tushuntirish xatlari olingan. Ushbu masala kollegial organ muhokamasiga kiritilishi belgilangan.
“Biz quruvchining ish haqini olishi tarafdorimiz. Quruvchi ish haqini o‘zi so‘ragan muddat ichida to‘liq oladi. Shu bilan bir qatorda, budjet mablag‘ini ham maqsadli ajratilishiga birinchidan qonun oldida, ikkinchidan vijdon oldida javob berish mas’uliyatini his qilgan holda yuqoridagi masalani oxiriga yetkazamiz. Lekin muammoning shu darajaga kelib qolishiga sababchi bo‘lgan va bugun hech kimning ko‘ziga ko‘rinmasdan, o‘z manfaati yo‘lida ‘suvni loyqalatayotganlar’, albatta, qonun oldida javob beradi”, — deyiladi tashkilot axborot xizmati xabarida.
Eslatib o‘tamiz, Yoshlar ittifoqi Prezident farmoni bilan 2020-yil 30-iyunda Yoshlar ishlari agentligi sifatida qayta tashkil etilgan. Unga Alisher Sa’dullayev direktor etib tayinlangan.
Izoh (0)