Ижтимоий тармоқларда «Жиззах Реал қурилиш таъмир» МЧЖ директори Шуҳрат Сотволдиев имзолаган хат сурати тарқалди. Хатда тадбиркор Президент топшириғи ва бош вазирнинг биринчи ўринбосари Очилбой Раматов тасдиқлаган ҳужжатга ишониб, Ёшлар иттифоқи учун Жиззах вилоятида 14,3 миллиард сўмлик бинони деярли ўз ҳисобидан қургани қайд этилган. Бу ҳақда «Gazeta.uz» хабар берди.
«Шундан салкам 9 миллиард сўмини ҳали олганим йўқ. Ёшлар иттифоқининг раҳбарлари мени бир ярим йилдан бери сарсон қилиб, адойи тамом қилди. Бор-будимдан айрилиш арафасида турибман. Ўзимни ўлдириш даражасига етиб келдим. 15 декабрь куни тонгда Ўзбекистон Ёшлар иттифоқи Марказий кенгаши биноси олдида очлик эълон қиламан. Иттифоқ пулимни сўнгги тийинигача бермагунича овқат ҳам емайман, сув ҳам ичмайман. Менинг ортимда турган 300 дан ортиқ оила ҳаққи-ҳурмати бу ноҳақликлардан ўлимга ҳам тайёрман», — дейилади хатда.
Ўзбекистон Ёшлар иттифоқи мазкур масала юзасидан муносабат билдирди. Унда қайд этилишича, қарзнинг бир қисми тўлаб берилган.
«Шу кунга қадар ‘Ёшлар қурилиш инвест’ МЧЖнинг ‘Жиззах Реал қурилиш таъмир’ МЧЖ олдидаги қарздорлигининг жами 7,9 миллиард сўм қисми Ўзбекистон Ёшлар иттифоқи томонидан қоплаб берилди. Яна 1,5 миллиард сўм қисми эса Жиззах вилояти ҳокимлиги томонидан ажратилди (02.12.2020 ҳолатига кўра). ‘Ёшлар қурилиш инвест’нинг қурувчи олдидаги жами қарздорлигининг 9,4 миллиард сўм қисми қопланди (бир ой олдин 5,6 миллиард сўм эди)», — дейилади хабарда.
Шунингдек, иттифоқ бунга қадар тегишли мутахассислар иштирокида «Ёшлар қурилиш инвест» фаолияти бўйича ўрганиш ўтказилганини маълум қилган. Таъкидланишича, аудит текшируви натижасида қатор молиявий камчиликлар аниқланган ва улар бўйича МЧЖ масъул ходимларидан тушунтириш хатлари олинган. Ушбу масала коллегиал орган муҳокамасига киритилиши белгиланган.
«Биз қурувчининг иш ҳақини олиши тарафдоримиз. Қурувчи иш ҳақини ўзи сўраган муддат ичида тўлиқ олади. Шу билан бир қаторда, бюджет маблағини ҳам мақсадли ажратилишига биринчидан қонун олдида, иккинчидан виждон олдида жавоб бериш масъулиятини ҳис қилган ҳолда юқоридаги масалани охирига етказамиз. Лекин муаммонинг шу даражага келиб қолишига сабабчи бўлган ва бугун ҳеч кимнинг кўзига кўринмасдан, ўз манфаати йўлида ‘сувни лойқалатаётганлар’, албатта, қонун олдида жавоб беради», — дейилади ташкилот ахборот хизмати хабарида.
Эслатиб ўтамиз, Ёшлар иттифоқи Президент фармони билан 2020 йил 30 июнда Ёшлар ишлари агентлиги сифатида қайта ташкил этилган. Унга Алишер Саъдуллаев директор этиб тайинланган.
Изоҳ (0)