Vazirlar Mahkamasi huzuridagi Din ishlari bo‘yicha qo‘mita raisining birinchi o‘rinbosari Muzaffar Komilov Qur’on va hadis bo‘yicha musobaqalar to‘xtatib qo‘yilmaganini ma’lum qildi. Bu haqda “Xalq so‘zi online” xabar bermoqda.
“Qur’on musobaqasini hech kim to‘xtatib qo‘ygani yo‘q. Agar tashkilotchilar taklif bilan chiqsa, albatta, dasturga kiritiladi va o‘rnatilgan tartibda o‘tkaziladi.
Hozir ham dastur bo‘yicha diniy soha xodimlari o‘rtasida Qur’on va hadis bo‘yicha musobaqalar o‘tkazilmoqda. Bu musobaqa hech qachon to‘xtatilmagan, to‘xtatilmaydi.
Ushbu musobaqa soha mutaxassislari o‘rtasida o‘tkazilishi maqsadga muvofiqroq, chunki biz ularni xalqaro musobaqalarga yuboramiz”, — degan Komilov 10-dekabr kuni AOKAda O‘zbekistonning diniy erkinlik bo‘yicha “Maxsus kuzatuvdagi davlatlar ro‘yxati”dan chiqarilgani yuzasidan o‘tkazilgan matbuot anjumanida.
Eslatib o‘tamiz, Prezident Shavkat Mirziyoyevning 2017-yil 1-sentabr kuni Hazrati Imom majmuasida davlat, jamoat, yoshlar tashkilotlari vakillari va diniy soha xodimlari bilan bo‘lib o‘tgan uchrashuvda bergan ko‘rsatmalari asosida 2018-yildan boshlab mamlakatning barcha hududida Qur’on musobaqasi o‘tkazilgandi.
Qur’on musobaqasida O‘zbekiston musulmonlari idorasi tasarrufidagi diniy ta’lim muassasalari va Toshkent islom universiteti talabalaridan tashqari, masjidlardagi imom-xatiblar, imom noiblari hamda Qur’oni karim qiroati bo‘yicha iqtidori bo‘lgan 18—40 yoshdagi barcha erkak va ayol fuqarolar ishtirok etishi mumkin. Musobaqa g‘oliblari sovg‘a sifatida Umra ziyoratiga boradi va avtomobilga ega bo‘ladi.
Izoh (0)