Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Музаффар Комилов Қуръон ва ҳадис бўйича мусобақалар тўхтатиб қўйилмаганини маълум қилди. Бу ҳақда «Халқ сўзи online» хабар бермоқда.
«Қуръон мусобақасини ҳеч ким тўхтатиб қўйгани йўқ. Агар ташкилотчилар таклиф билан чиқса, албатта, дастурга киритилади ва ўрнатилган тартибда ўтказилади.
Ҳозир ҳам дастур бўйича диний соҳа ходимлари ўртасида Қуръон ва ҳадис бўйича мусобақалар ўтказилмоқда. Бу мусобақа ҳеч қачон тўхтатилмаган, тўхтатилмайди.
Ушбу мусобақа соҳа мутахассислари ўртасида ўтказилиши мақсадга мувофиқроқ, чунки биз уларни халқаро мусобақаларга юборамиз», — деган Комилов 10 декабрь куни АОКАда Ўзбекистоннинг диний эркинлик бўйича «Махсус кузатувдаги давлатлар рўйхати»дан чиқарилгани юзасидан ўтказилган матбуот анжуманида.
Эслатиб ўтамиз, Президент Шавкат Мирзиёевнинг 2017 йил 1 сентябрь куни Ҳазрати Имом мажмуасида давлат, жамоат, ёшлар ташкилотлари вакиллари ва диний соҳа ходимлари билан бўлиб ўтган учрашувда берган кўрсатмалари асосида 2018 йилдан бошлаб мамлакатнинг барча ҳудудида Қуръон мусобақаси ўтказилганди.
Қуръон мусобақасида Ўзбекистон мусулмонлари идораси тасарруфидаги диний таълим муассасалари ва Тошкент ислом университети талабаларидан ташқари, масжидлардаги имом-хатиблар, имом ноиблари ҳамда Қуръони карим қироати бўйича иқтидори бўлган 18—40 ёшдаги барча эркак ва аёл фуқаролар иштирок этиши мумкин. Мусобақа ғолиблари совға сифатида Умра зиёратига боради ва автомобилга эга бўлади.
Изоҳ (0)