АҚШ конгресси вакиллар палатасининг Республикачилар партиясидан бўлган 106 аъзоси амалдаги давлат раҳбари Дональд Трампнинг рақиби — демократ Жо Байден ғалабага эришган бир қатор штатларда президент сайлови натижаларини қайта кўриб чиқиш ҳақидаги даъвони қўллаб-қувватлади, деб ёзади «РБК».
Гап Жоржия, Мичиган, Пенсильвания ва Висконсин штатлари ҳақида бормоқда. Республикачилар «суд дўстлари» мурожаатини берган. Америка ҳуқуқ тизимида суд можаросининг тўғридан-тўғри иштирокчиси бўлмаган манфаатдор шахслар шундай аталади. Улар ўз фикрини билдириш мақсадида судга ёзма мурожаат қилиш ҳуқуқига эга. Унда, хусусан, сайловларда йўл қўйилган қонун бузилишлари натижаларни ва Америка сайлов тизимининг яхлитлигини шубҳа остига қўяди.
8 декабрь куни Техас бош прокурори Кен Пекстон тўртта штатда президент сайлови натижаларини қайта кўриб чиқишни сўраб Олий судга ариза берган эди. Ҳокимият тепасида республикачилар бўлган 17 та штат вакиллари ушбу даъвони қўллаб-қувватлади.
Гап Миссури, Алабама, Арканзас, Флорида, Индиана, Канзас, Луизиана, Миссисипи, Монтана, Небраска, Шимолий Дакота, Оклахома, Жанубий Каролина, Жанубий Дакота, Теннесси, Юта ва Ғарбий Виржиния ҳақида бормоқда.
Пекстон Жоржия, Мичиган, Пенсильвания ва Висконсин штатларида (уларнинг барчасида демократ Жо Байден ғолиб бўлган) сайлов натижалари ҳақиқий эмас деб топилишига эришмоқчи. Техас бош прокурори фикрича, ушбу штатларда, шу жумладан, почта орқали юборилган бюллетенларни кўриб чиқишга алоқадор меъёрларга риоя қилинмаган.
Дональд Трамп 3 ноябрда бўлиб ўтган сайловларда мағлуб бўлганини тан олмай, сайлов натижалари қалбакилаштирилганини даъво қилмоқда. У баъзи муҳим штатларда овоз бериш якунлари қайта кўриб чиқилишини талаб қилиб, бунинг учун 9 миллион доллар ҳам сарфлади. Аммо бюллетенларнинг қайта санаб чиқилиши Байденнинг ғалабасини кўрсатди. Судлар ҳам амалдаги президент жамоасининг овоз бериш ва бюллетенларни ҳисоблаш жараёнидаги қонун бузилишлари ҳақидаги даъволарини рад этди.
Изоҳ (0)