Qoraqalpog‘istonda bir oilaning 4 nafar a’zosi va 2 nafar mehmon is gazidan zaharlanib vafot etdi

Qoraqalpog‘istonning Xo‘jayli tumanida 6 kishi is gazidan zaharlanib vafot etdi. Bu haqda Qoraqalpog‘iston Respublikasi prokuraturasi xabar berdi.

Ma’lum bo‘lishicha, 9-dekabr kuni soat 17:00 larda Xo‘jayli tumani IIBga 6 nafar fuqaro is gazidan zaharlanish oqibatida halok bo‘lgani haqida xabar kelib tushgan.

Aniqlanishicha, tumanning “Samanko‘l” MFYdagi xonadonlarning birida yashovchi G.Y. va A.R. hamda ularning farzandlari 2009-yilda tug‘ilgan X.E. va 2013-yilda tug‘ilgan X.A., shuningdek, ushbu xonadonga mehmon bo‘lib kelgan fuqarolar K.A. va X.A. uyni isitish uchun o‘rnatilgan pechdan chiqqan is gazidan zaharlanib vafot etgan.

Hozirda ushbu holat bo‘yicha Xo‘jayli tumani prokuraturasi tomonidan tergov-surishtiruv ishlari olib borilmoqda. Tergov harakatlari Qoraqalpog‘iston Respublikasi prokuraturasi tomonidan nazoratga olingan.

Avvalroq Nukusda ijarada yashayotgan 4 nafar talaba qiz, Yangiyo‘lda bir oilaning 5 nafar a’zosi is gazidan zaharlangani xabar berilgan edi. Shuningdek, Navoiyda ikki nafar aka-uka is gazidan zaharlanib vafot etgani, Samarqandda qo‘lbola pechdan is gazi sizib chiqishi oqibatida yosh er-xotin vafot etgani xabar berilgan, keyinroq ular ikki kun avval turmush qurgani ma’lum bo‘lgandi.