Қорақалпоғистонда бир оиланинг 4 нафар аъзоси ва 2 нафар меҳмон ис газидан заҳарланиб вафот этди

Қорақалпоғистоннинг Хўжайли туманида 6 киши ис газидан заҳарланиб вафот этди. Бу ҳақда Қорақалпоғистон Республикаси прокуратураси хабар берди.

Маълум бўлишича, 9 декабрь куни соат 17:00 ларда Хўжайли тумани ИИБга 6 нафар фуқаро ис газидан заҳарланиш оқибатида ҳалок бўлгани ҳақида хабар келиб тушган.

Аниқланишича, туманнинг «Саманкўл» МФЙдаги хонадонларнинг бирида яшовчи Г.Ю. ва А.Р. ҳамда уларнинг фарзандлари 2009 йилда туғилган Х.Э. ва 2013 йилда туғилган Х.А., шунингдек, ушбу хонадонга меҳмон бўлиб келган фуқаролар К.А. ва Х.А. уйни иситиш учун ўрнатилган печдан чиққан ис газидан заҳарланиб вафот этган.

Ҳозирда ушбу ҳолат бўйича Хўжайли тумани прокуратураси томонидан тергов-суриштирув ишлари олиб борилмоқда. Тергов ҳаракатлари Қорақалпоғистон Республикаси прокуратураси томонидан назоратга олинган.

Аввалроқ Нукусда ижарада яшаётган 4 нафар талаба қиз, Янгийўлда бир оиланинг 5 нафар аъзоси ис газидан заҳарлангани хабар берилган эди. Шунингдек, Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани хабар берилган, кейинроқ улар икки кун аввал турмуш қургани маълум бўлганди.