«Foton» АЖнинг давлатга тегишли акциялар пакетини россиялик инвесторларга сотиш таклиф қилинмоқда. Бу каби таклифни «Ўзэлтехсаноат» ассоциациясининг биринчи ўринбосари Мансур Ҳошимов Тошкентда ўтказилган учрашувда Россия томонига билдирган, деб хабар беради «Gazeta.uz».
Мансур Ҳошимовнинг сўзларига кўра, ишлаб чиқарилган яримўтказгичли маҳсулотлар ҳукуматлараро келишув доирасида мудофаа саноати корхоналари эҳтиёжлари учун Россияга тўлиқ экспорт қилинмоқда. 2020 йилнинг январь—ноябрь ойларида жами 1,17 миллион долларлик маҳсулот экспорт қилинган (2019 йилда — 1,33 миллион долларлик).
«Корхонанинг электрон қурилмаларни ишлаб чиқаришдаги узоқ йиллик тажрибасини, соҳадаги малакали техник мутахассислар мавжудлигини, шунингдек, Россия Ўзбекистоннинг стратегик муҳим аҳамиятга эга иттифоқдоши эканлигини инобатга олган ҳолда ‘Foton’нинг 85,15 фоиз миқдордаги акциялар пакетини сотиб олиш имкониятини таклиф қилмоқчимиз», — дейди Мансур Ҳошимов.
Шунингдек, у «Foton» базасида мудофаа комплекси ва халқ хўжалиги корхоналари учун электрон қурилмалар ҳамда маҳсулотларни ишлаб чиқаришни ташкиллаштиришни таклиф этган: микросхемалар, юқори волтли тўғирлагич устунлар, ярим ўтказгичли тўғирлагич ва куч диодларини, майдон транзисторлари, операцион кучайтиргичлар ва ҳоказо.
Бундан ташқари, кейинчалик Россияда саноат корхоналари эҳтиёжлари учун етказиб бериш билан Ўзбекистон ҳудудида ишлаб чиқаришни ривожлантиришни йўлга қўйиш мақсадида замонавий электрон компонентлар (микросхемалар ва бошқалар)нинг янги ишланмалари ва технологияларини тақдим этиш таклифи билдирилди.
Эслатиб ўтамиз, «Foton» мақсадли дастурлар орқали оммавий кимошди савдосига қўйилган 62 та давлат активи рўйхатига киритилган эди.
Маълумот учун, «Foton» заводига 1942 йилда асос солинган бўлиб, ҳозирда 68 минг метр квадратга яқин майдонда иккита ишлаб чиқариш биносига эга. Давлат 257 мутахассис ишлайдиган корхонанинг 83,15 фоиз акцияларига эгалик қилади.
Изоҳ (0)