2020-yilning o‘tgan davrida 1110 nafar I va II guruh nogironligi bo‘lgan hamda mustaqil harakatlanish imkoniyatiga ega bo‘lmagan fuqaroga pensiya va nafaqa mablag‘lari ularning yashash manzillariga o‘z vaqtida yetkazib berilmagan. Bu haqda Moliya vazirligi huzuridagi budjetdan tashqari Pensiya jamg‘armasi “Daryo”ga ma’lum qildi.
O‘zbekiston Prezidentining 2017-yil 13-martdagi PQ-2826-sonli qarorlariga muvofiq, pensiya va nafaqalar AT “Xalq banki” maxsus kassalari tomonidan mahalla fuqarolar yig‘inlari binosida amalga oshiriladi. Ushbu qarorda mustaqil harakatlanish hamda pensiyalar va nafaqalarni maxsus kassalardan olish imkoniyatiga ega bo‘lmagan shaxslarga pensiyalar va nafaqalar “Xalq banki” tomonidan bevosita ular yashaydigan joyga yetkazib berilishi belgilangan.
Xususan, pensiya va nafaqa to‘lovlarini o‘z vaqtida amalga oshirilishi uchun mablag‘lar Pensiya jamg‘armasi tomonidan muddatidan avval har oyning 13—14-sanasiga qadar to‘liq moliyalashtirilmoqda (amaldagi tartib bo‘yicha 27-sanasiga qadar).
Yuqoridagilarga muvofiq, AT “Xalq banki”ning maxsus kassalari tomonidan yotoqdagi va nogironligi bo‘lgan shaxslarga to‘lovlar bevosita ularning yashash manzillariga yetkazilmoqda. Biroq 2020-yilning o‘tgan davrida 1110 nafar I va II guruh nogironligi bo‘lgan hamda mustaqil harakatlanish imkoniyatiga ega bo‘lmagan fuqaroga pensiya va nafaqa mablag‘lari ularning yashash manzillariga o‘z vaqtida yetkazib berilmagani aniqlangan.
Jamg‘armaning ma’lum qilishicha, aniqlangan kamchiliklar joyida bartaraf etilib, aybdor xodimlarga tegishli intizomiy jazo choralari ko‘rib borilmoqda.
Avvalroq Namangan, Navoiy va Samarqandda sayyor kassalar tomonidan pensiya to‘lovlarini kech to‘lash holatlari aniqlangan edi.
Izoh (0)