Tasvirlardan ko‘rish mumkinki, norozilik ishtirokchilari 20 nafar atrofida, ularning ko‘pchiligi — ayollardan iborat. Ular bilan YHXB xodimlari suhbatlashmoqda. Odamlar 60 ga yaqin xonadon gazsiz qolganini ta’kidlayapti.
“Xalq so‘zi Online” nashrining yozishicha, o‘rganishlar jarayonida videomaterial Buxoro tumanidagi “Rabotipoyon” mahalla fuqarolar yig‘inida tasvirga olinganligi ma’lum bo‘lgan. Aniqlanishicha, 949 ta xonadonda 5 ming 610 nafar kishi istiqomat qilayotgan “Rabotipoyon” mahalla fuqarolar yig‘inida ayni paytda tabiiy gaz bosimi pasaygan. Mutaxassislar buni ob-havoning keskin tushib ketishi natijasida gaz iste’moli ko‘payishi va oqibatda hudud aholisining aksariyat xonadonlarida tabiiy gaz bosimida muammolar paydo bo‘lganligi bilan izohlagan.
Vaziyat bo‘yicha Buxoro viloyati hokimiyati izoh bergan. “Holat viloyat hokimligi, sektorlar rahbarlari va soha mutasaddilari tomonidan o‘rganilmoqda. O‘rganish yakunlari bo‘yicha batafsil axborot beriladi”, — deyiladi hokimiyat xabarida.
Eslatib o‘tamiz, o‘tgan yili Andijon, Farg‘ona, Sirdaryo viloyatlari hamda Qoraqalpog‘istonda gaz va elektr energiyasi yo‘qligi sabab aholi yo‘llarni yopib qo‘yishgandi va shu orqali o‘z muammolariga hokimiyat vakillarini e’tiborini tortishga urinishgan edi.
Izoh (0)