Bayden o‘z prezidentligining 100 kuni ichida 100 millionta vaksinatsiyani va’da qildi

AQShning saylangan prezidenti Jo Bayden o‘z lavozimida o‘tkazilgan ilk 100 kun davomida koronavirus pandemiyasiga qarshi kurashish rejalarini ma’lum qildi, deb yozadi “RBK”.

Demokratning so‘zlariga ko‘ra, u prezident lavozimiga kirishganidan keyingi ilk 100 kun mobaynida uning ma’muriyati 100 millionta vaksinatsiyani amalga oshiradi. “100 kun ichida biz kasallikning kechishini va Amerikadagi hayotni yaxshi tomonga o‘zgartirishimiz mumkin”, — dedi u.

Bundan tashqari, Bayden niqob taqish bo‘yicha talablarni kuchaytirish taklifini takrorladi. Uning so‘zlariga ko‘ra, bu federal hukumatning barcha binolarida va jamoat transportida majburiy bo‘lishi kerak.

Saylangan prezident qo‘shimcha qilishicha, yangi lavozimidagi ilk 100 kun ichida AQShda pandemiyani yengishiga umid qilmayapti. “Biz bu chigalliklarga birdaniga tushib qolganimiz yo‘q va undan tez chiqib keta olmaymiz. Bu biroz vaqt talab qiladi”, — dedi u.

Jons Hopkins universiteti ma’lumotlariga ko‘ra, AQShda 15 milliondan ortiq kishi koronavirusga chalingan, 284,4 mingdan ziyodi vafot etgan. Shu ikkita ko‘rsatkich bo‘yicha mamlakat dunyoda birinchilikni egallab turibdi.

Avvalroq AQSh aholisi COVID-19’ga qarshi hammadan birinchi bo‘lib emlanishi xabar berilgan edi. AQSh prezidenti Donald Tramp imzolaydigan farmonga muvofiq, amerikaliklar emlanganidan keyingina koronavirusga qarshi vaksinalar boshqa mamlakatlarga ham yetkazilishni boshlaydi. Fox News prognoziga ko‘ra, mamlakatda barcha xohlovchilar emlanganidan keyin, bahor oxiri — yoz boshlarida AQSh vaksinalarni xalqaro foydalanishga yetkazib berishni boshlaydi.

AQSh sanitar nazorat boshqarmasi (FDA) 10-dekabr kungi majlisida Amerikaning Pfizer va Germaniyaning BioNTech kompaniyalari vaksinasidan foydalanishni ma’qullash-ma’qullamaslik masalasini hal qiladi. Mamlakatda Amerikaning Moderna kompaniyasi ishlab chiqqan yana bir vaksinani ro‘yxatdan o‘tkazish masalasi esa kelasi hafta, 17-dekabr kuni ko‘rib chiqiladi.