Moldova bosh vaziri Ion Kiku koronavirusga chalindi. Bu haqda hukumat matbuot xizmatiga tayanib “RBK” xabar qildi.
“COVID-19 virusiga xos alomatlar paydo bo‘lishi sababli bosh vazir Ion Kiku test topshirdi. Test javobi — musbat”, — deyiladi xabarda.
Hukumat Kiku masofadan turib ishlashini qo‘shimcha qilgan.
Moldova Sog‘liqni saqlash, mehnat va aholini ijtimoiy muhofaza qilish vazirligining ma’lumotlariga ko‘ra, 8-dekabrda 1709 kishida koronavirus aniqlangan. Moldovada epidemiya boshlanganidan beri 119 204 ta COVID-19 bilan bog‘liq holat aniqlangan.
Noyabr oyi oxirida Moldovada koronavirus tarqalishi sababli butun mamlakat bo‘ylab favqulodda holat joriy etildi. Ushbu chora 2021-yil 15-yanvargacha amal qiladi.
Ushbu davrda mamlakatda barcha ko‘ngilochar tadbirlar taqiqlandi, tungi klublar va karaoke faoliyati to‘xtatildi. Restoran, bar va kafelarga faqat soat 07:00 dan 22:00 gacha ishlashga ruxsat beriladi.
Avvalroq kichik Donald Tramp, Ukraina sog‘liqni saqlash vaziri, Ukraina prezidenti Vladimir Zelenskiy hamda FIFA prezidenti Janni Infantino koronavirusga chalingani haqida xabar berilgandi.
Izoh (0)