Байден ўз президентлигининг 100 куни ичида 100 миллионта вакцинацияни ваъда қилди

АҚШнинг сайланган президенти Жо Байден ўз лавозимида ўтказилган илк 100 кун давомида коронавирус пандемиясига қарши курашиш режаларини маълум қилди, деб ёзади «РБК».

Демократнинг сўзларига кўра, у президент лавозимига киришганидан кейинги илк 100 кун мобайнида унинг маъмурияти 100 миллионта вакцинацияни амалга оширади. «100 кун ичида биз касалликнинг кечишини ва Америкадаги ҳаётни яхши томонга ўзгартиришимиз мумкин», — деди у.

Бундан ташқари, Байден ниқоб тақиш бўйича талабларни кучайтириш таклифини такрорлади. Унинг сўзларига кўра, бу федерал ҳукуматнинг барча биноларида ва жамоат транспортида мажбурий бўлиши керак.

Сайланган президент қўшимча қилишича, янги лавозимидаги илк 100 кун ичида АҚШда пандемияни енгишига умид қилмаяпти. «Биз бу чигалликларга бирданига тушиб қолганимиз йўқ ва ундан тез чиқиб кета олмаймиз. Бу бироз вақт талаб қилади», — деди у.

Жонс Ҳопкинс университети маълумотларига кўра, АҚШда 15 миллиондан ортиқ киши коронавирусга чалинган, 284,4 мингдан зиёди вафот этган. Шу иккита кўрсаткич бўйича мамлакат дунёда биринчиликни эгаллаб турибди.

Аввалроқ АҚШ аҳолиси COVID-19’га қарши ҳаммадан биринчи бўлиб эмланиши хабар берилган эди. АҚШ президенти Дональд Трамп имзолайдиган фармонга мувофиқ, америкаликлар эмланганидан кейингина коронавирусга қарши вакциналар бошқа мамлакатларга ҳам етказилишни бошлайди. Fox News прогнозига кўра, мамлакатда барча хоҳловчилар эмланганидан кейин, баҳор охири — ёз бошларида АҚШ вакциналарни халқаро фойдаланишга етказиб беришни бошлайди.

АҚШ санитар назорат бошқармаси (FDA) 10 декабрь кунги мажлисида Американинг Pfizer ва Германиянинг BioNTech компаниялари вакцинасидан фойдаланишни маъқуллаш-маъқулламаслик масаласини ҳал қилади. Мамлакатда Американинг Moderna компанияси ишлаб чиққан яна бир вакцинани рўйхатдан ўтказиш масаласи эса келаси ҳафта, 17 декабрь куни кўриб чиқилади.