AQShda Pfizer vaksinasi sinovlarida 6 nafar ko‘ngilli vafot etgan

Amerikaning Pfizer va Germaniyaning BioNTech kompaniyasi hamkorlikda ishlab chiqqan vaksina sinovlarini o‘tkazish chog‘ida olti kishi vafot etgan. Bu haqda “RBK” AQSh Oziq-ovqatlar va dorilar sifati masalalari bo‘yicha boshqarmasi (FDA) tomonidan e’lon qilingan hujjatga tayanib xabar berdi.

“Hisobot davrida oltita o‘lim qayd etildi (vaksina olinayotgan guruhda ikkita, platsebo guruhida esa to‘rtta o‘lim)”, — deyiladi FDA’ning 10-dekabrga belgilangan majlisi uchun tayyorlangan 53 betli hujjatda.

Unda ta’kidlanishicha, vaksina olayotganlar guruhidagi birinchi qurbon ateroskleroz va semizlikdan azob chekkan. Ko‘ngilli dorining birinchi dozasi yuborilganidan keyin uch kun o‘tib vafot etgan. Vaksina olayotganlar guruhida vafot etgan ikkinchi ishtirokchida esa ikkinchi doza kiritilganidan keyin 60 kun o‘tib, yurak to‘xtab qolgan, yana uch kundan keyin uning o‘limi qayd etilgan.

Platsebo olganlar guruhidagi ikki kishi insult va infarktdan ko‘z yumgan, sinovlar ishtirokchilarining yana ikki nafari nimadan vafot etgani hozircha noma’lum. Olti qurbonning uch nafari 55 yoshdan katta bo‘lgan.

FDA xulosasida aytilishicha, Pfizer va BioNTech vaksina sifatini kafolatlovchi tegishli axborotni taqdim etgan. Dori birinchi dozadan keyinoq ahamiyatli himoyani ta’minlaydi, deyiladi hisobotda, bu esa vaksinani COVID-19’ga qarshi kurashish uchun xavfsiz va yuqori samarali vositaga aylantiradi.

Iyul oyida Pfizer AQSh hukumati bilan 50 million amerikalikni emlashga yetadigan 100 million doza (bir kishiga ikkitadan inyeksiya) vaksina yetkazib berish uchun 1,95 milliard dollarlik shartnoma imzolagan. Shartnoma dorining klinik sinovlari tugashidan oldinroq tuzilgan, farmokologik gigant vaksina samaradorligi isbotlangan taqdirdagina partiyani yetkazib berishi kerak edi. Noyabr oyida Pfizer va uning germaniyalik sherigi BioNTech tomonidan ishlab chiqilgan vaksina 95 foiz samaradorlik ko‘rsatdi va avvalroq tuzilgan shartnoma ishga solindi. Ammo NYT manbalarining ma’lum qilishicha, ishlab chiqaruvchilar shartnomani imzolash bosqichidayoq Oq uyga yana 100 millionta dozadan iborat qo‘shimcha partiyani sotib olish imkoniyatini ko‘rib chiqishni taklif qilgan. Prezident ma’muriyati esa bundan voz kechgan.

Bloomberg xabariga ko‘ra, AQSh Pfizer vaksinasidan 600 millionta dozani oldindan buyurtma qilib qo‘ygan. Yil oxirigacha kompaniya 100 millionta doza ishlab chiqarishi kerak edi, ammo unda ilk bosqichlarda xomashyo yetkazib berish bilan bog‘liq muammolar yuzaga keldi, shu sababli ikki marta kamroq doza ishlab chiqaradi.

Pfizer prezidenti Albert Burla vaksinadan yil oxirigacha 50 million, 2021-yilda esa 1,3 milliard dozagacha ishlab chiqarish rejalarini e’lon qildi.

Avvalroq AQSh aholisi COVID-19’ga qarshi hammadan birinchi bo‘lib emlanishi xabar berilgan edi. AQSh prezidenti Donald Tramp imzolaydigan farmonga muvofiq, amerikaliklar emlanganidan keyingina koronavirusga qarshi vaksinalar boshqa mamlakatlarga ham yetkazilishni boshlaydi.

AQSh sanitar nazorat boshqarmasi (FDA) 10-dekabr kungi majlisida Amerikaning Pfizer va Germaniyaning BioNTech kompaniyalari vaksinasidan foydalanishni ma’qullash-ma’qullamaslik masalasini hal qiladi. Mamlakatda Amerikaning Moderna kompaniyasi ishlab chiqqan yana bir vaksinani ro‘yxatdan o‘tkazish masalasi esa kelasi hafta, 17-dekabr kuni ko‘rib chiqiladi.