Toshkent viloyatining Bekobod tumanida “Qizil kitob”ga kiritilgan 7 bosh noyob lochinni O‘zbekistondan olib chiqib ketmoqchi bo‘lgan shaxs ushlandi. Bu haqda Bojxona qo‘mitasi matbuot xizmati xabar berdi.
Qayd etilishicha, Toshkent viloyati bojxona boshqarmasi Kontrabandaga qarshi kurashish va bojxona auditi bo‘limi tomonidan Davlat xavfsizlik xizmati xodimlari bilan birgalikda O‘zbekistonda yo‘qolib borayotgan jonzotlarning bojxona chegaralari orqali noqonuniy ravishda olib chiqib ketilishining oldini olishga qaratilgan tezkor tadbir o‘tkazilgan.
Shaharning chegaradosh hududida harakatlanayotgan shaxs tezkor xodimlar tomonidan kuzatuvga olinganini sezib qolgach, shu yerdagi uylardan biriga qochib kiradi va yashirinishga uringan. Mazkur xonadon belgilangan tartibda ko‘zdan kechirilib, qochishga uringan shaxsning qo‘lidagi sumka ochib ko‘rilganida, uning ichida 7 bosh lochin borligi aniqlangan.
“Noqonuniy ravishda olib o‘tishda atrofdagilarga sezdirmaslik maqsadida qushlarning ko‘zi, oyoqlari bog‘lab qo‘yilgan, qanotlari esa skotchlangan. Shuningdek, ular sumkaga zich holatda joylashtirilgan bo‘lib, bu holatni qushlarga nisbatan vahshiylik deb izohlash mumkin”, — deb qayd etilgan qo‘mita xabarida.
Ma’lum qilinishicha, ayni paytda lochinlar Toshkent hayvonot bog‘ida saqlanmoqda. Keltirilgan kuni ularning 4 nafari og‘ir ahvolda bo‘lgan. Hayvonot bog‘i veterinarlari tomonidan ko‘rsatilgan muolaja va parvarishlardan so‘ng ularning holati yaxshilangan.
Amaldagi tartiblarga ko‘ra, lochinlarga chip o‘rnatildi va endi ular Xalqaro reyestrga kiritildi. 90 kunlik karantin sharoitidagi parvarishdan so‘ng lochinlar yana ona-tabiat qo‘yniga uchirib yuboriladi.
O‘zbekistonning 2019-yilda chop etilgan “Qizil kitob”iga “Itolg‘i” nomi bilan kiritilgan ushbu lochinlar asosan G‘arbiy Tyan-Shan va Hisor-Oloy tog‘ tizmalari hamda Qizilqum cho‘lida uchraydi. So‘nggi hisob-kitoblarga ko‘ra, mamlakatimizda bu kabi “Itolg‘i” lochinlari keskin kamayib, hozirda atigi 70 juft saqlanib qolgani taxmin qilinadi.
Lochinlarni noqonuniy ravishda olib chiqishga uringan shaxslar ularning har birining bahosini o‘rtacha 30 million so‘mdan ekanligini ta’kidlashgan. Vaholanki, dunyo bo‘ylab qora bozorlarda lochinlarning narxi 15 ming dollardan 150 ming dollargacha baholanadi. Ularning qo‘lga o‘rgatilganlari esa hattoki bir necha million dollar turadi.
Hozirda mazkur holat yuzasidan bojxona organlari tomonidan surishtiruv harakatlari davom ettirilmoqda.
Izoh (0)