YuNESKO Ijroiya qo‘mitasining 2-dekabr kuni ish boshlagan 210-sessiyasi 2021-yilning 27-yanvariga qadar davom etadi, deb xabar bermoqda O‘zbekiston turizmni rivojlantirish davlat qo‘mitasi.
Qayd etilishicha, tadbir yalpi majlisida YuNESKO bosh direktori Odri Azule tashkilot faoliyati haqida so‘z yuritar ekan, kelgusi yil ikkinchi muddatga egallab turgan lavozimiga o‘z nomzodini ilgari surish istagi haqida rasman e’lon qilgan.
YuNESKOning O‘zbekistondagi milliy komissiyasi raisi, bosh vazir o‘rinbosari Aziz Abduhakimovning so‘zlariga ko‘ra, yalpi majlisda mamlakatning YuNESKOdagi doimiy vakolatxonasi rahbari ham ishtirok etib, O‘zbekiston 2021-yilning noyabr oyida bosh konferensiya 41-sessiyasi doirasida bo‘lib o‘tadigan saylovda Odri Azule nomzodini qo‘llab-quvvatlashini ma’lum qilgan.
Odri Azule tashkilotni samarali va professional tarzda boshqarib, xalqaro hamjamiyatni murakkab damlarda, jumladan, bugungi pandemiya sharoitida o‘zaro muloqot, anglashuv va tinchlikni targ‘ib qilish orqali birlashtira olgani alohida qayd etilgan. Tadbir doirasida O‘zbekistonning YuNESKOdagi vakili tashkilot to‘g‘ri yo‘lda ekani hamda O‘zbekiston kelgusida ham uning shu yo‘sinda rivojlanishi tarafdori ekanini qo‘shimcha qilgan.
Xususan, Azule ma’ruzasida ilgari surilgan butun dunyoda ta’lim, ilm-fan, texnologiyalar va axborot olish ko‘lamini yana-da kengaytiruvchi, shuningdek atrof-muhit bilan yanada xavfsiz va samarali muloqot qilish usullarini ishlab chiqishni hamda insonning asosiy huquqlarini targ‘ib qilish orqali adolatli va tinchliksevar jamiyatni yaratishga doir sa’y-harakatlarni qo‘llab-quvvatlashni nazarda tutuvchi strategik maqsadlar surilgan takliflari alohida e’tirof etilgan.
Tadbirda mamlakatning noyob moddiy va nomoddiy madaniy merosini targ‘ib qilish sohasida O‘zbekistonning tashkilotga a’zo davlatlar va YuNESKO kotibiyati bilan hamkorlik aloqalarini kengaytirishga tayyor ekanligi qayd etilgan.
O‘zbekiston vakili “Baxshi san’ati”ni Insoniyatning nomoddiy madaniy merosining Reprezentativ ro‘yxatiga kiritish va “Ipak yo‘li: Zarafshon-Qoraqum yo‘lagi” transmilliy faylini Jahon merosi ro‘yxatiga kiritish masalasida hamkorlarning qo‘llab-quvvatlashiga katta ishonch bildirishini ta’kidladi.
Ma’lumot uchun, bugungi kunga qadar YuNESKOning Insoniyat nomoddiy merosi reprezentativ ro‘yxatiga “Shashmaqom” va Boysun madaniy muhiti (2008), katta ashula (2009), askiya (2014), palov va Navro‘z bayrami (2016), Xorazmning “Lazgi” raqsi (2019) kiritilgan edi. 2020-yilda “Nasriddin Afandi latifalari”ni YuNESKO madaniy boyligi ro‘yxatiga kiritish taklif qilingan.
Izoh (0)