Тошкент бозорларининг даромади ва соф фойдаси ҳақида маълумот берилди

Spot нашри Тошкент бозорларининг даромади ва уларнинг қанча соф фойда қилиши ҳақида маълумотларни эълон қилди.

Маълум қилинишича, октябрь ойи охирида Президент Шавкат Мирзиёев 500 дан ортиқ бозор ва савдо мажмуаларини босқичма-босқич ислоҳ қилишни назарда тутувчи фармон имзолади.

Шунингдек, Давлат активларини бошқариш агентлиги матбуот хизмати давлат улуши бўлган бозорлар ва савдо марказларининг молиявий кўрсаткичлари ва мулкий муаммолари ўрганилаётгани, алоҳида лойиҳа ишлаб чиқилаётгани ҳақида хабар берди.

Жараённинг ўзи ҳали бошланмаган ва фақатгина тегишли қарор чиқарилгандан кейингина ишга туширилади. Бунгача лойиҳа муҳокамага қўйилади, мутахассислар жалб қилинади. Бу бир неча ой ёки ундан кўпроқ давом этадиган кўп босқичли жараён ҳисобланади.

Шунга қарамай, 450 дан ортиқ бозорлар ва савдо мажмуаларининг молиявий кўрсаткичлари аллақачон очиқланган. Масалан, Сергели автомобиль бозори йилига 3,3 миллиард сўм соф фойда келтирадиган бўлиб чиқди. Ўрикзор бозори икки йил ичида зарардан фойда олишга ўтди.

Марказий бозорлардан бири Олой эса 150 миллион сўмдан ортиқ фойда келтирмайди. Паркент бозори бундан ҳам кам — 2018 йилда 53,3 миллион ва 2019 йилда 21,3 миллион даромад кўрган. Аския бозори эса сўнгги икки йил ичида йилига 10 миллион сўмдан кам фойда кўрмоқда.

Бу ерда шуни ёдда тутиш керакки, бозорлар даромадларининг катта қисми солиқ тўлашга тўғри келади. Масалан, умуман фойдаси бўлмаган Чорсу кийим-кечак бозори 2019 йилда 2,9 миллиард сўм даромад олди, шундан 1,8 миллиард сўм солиқ тўлашга сарфланди.

Бироқ нашрга маълумот берган мутахассислар пойтахт бозорларининг даромади, шунингдек, соф фойдаси анча юқори бўлиши мумкинлигини таъкидлади.

Мамлакат бўйлаб 500 га яқин бозорларнинг молиявий натижалари тўғрисида кўпроқ маълумотни бу ерда кўришингиз мумкин.

Аввалроқ Ўзбекистонда ўтган 11 ой давомида бозор ва савдо комплексларида жами 9 та ёнғин содир бўлгани ҳақида хабар берилганди.