AQSh prezidenti Donald Tramp imzolaydigan farmonga muvofiq, amerikaliklar emlanganidan keyingina koronavirusga qarshi vaksinalar boshqa mamlakatlarga ham yetkazilishni boshlaydi. Bu haqda prezident ma’muriyatidagi yuqori mansabli amaldorlarga tayanib, Fox New telekanali xabar bergan, deb yozadi “RBK”.
“Birinchi galdagi vazifa ushbu vaksinalarni butun dunyo bo‘ylab yetkazib berishdan oldin ularni amerikaliklar orasida tarqatishni ta’minlashdan iborat”, — dedi telekanal manbalaridan biri.
Uning prognoziga ko‘ra, mamlakatda barcha xohlovchilar emlanganidan keyin, bahor oxiri — yoz boshlarida AQSh vaksinalarni xalqaro foydalanishga yetkazib berishni boshlaydi.
Yana bir mansabdor aytishicha, COVID-19’ga qarshi vaksinalar AQShda “juda yaqin orada” taqdim etiladi. Uning so‘zlariga ko‘ra, Trampning farmoni sog‘liqni saqlash vazirligi va ijtimoiy xizmatlar zimmasiga vaksinani aholi orasida “hech misli ko‘rilmagan” tezlik bilan taqsimlash tartibini belgilashni yuklaydi.
AQSh vaksinadan xalqaro foydalanish imkoniyatini yo‘lga qo‘ygach, nochor mamlakatlarning dorini sotib olishiga yordam berish uchun manbalarni jalb qiladi, deya qo‘shimcha qildi telekanal manbasi.
Trampning ehtimoliy farmoni haqidagi xabarlar AQSh sanitar nazorat boshqarmasi (FDA)ning majlisidan bir necha kun avval paydo bo‘ldi, unda regulyator Amerikaning Pfizer va Germaniyaning BioNTech kompaniyalari vaksinasidan foydalanishni ma’qullash-ma’qullamaslik masalasini hal qiladi. Mamlakatda Amerikaning Moderna kompaniyasi ishlab chiqqan yana bir vaksinani ro‘yxatdan o‘tkazish masalasi esa kelasi hafta, 17-dekabr kuni ko‘rib chiqiladi.
Ikkala vaksina ham sinovlar chog‘ida yuqori samaradorlik ko‘rsatdi. Pfizer dorisining samaradorligi 95 foiz, Moderna vaksinasiniki — 94,1 foiz (og‘ir holatlarda 100 foiz)ni tashkil etdi.
Bloomberg xabariga ko‘ra, AQSh Pfizer vaksinasidan 600 millionta dozani oldindan buyurtma qilib qo‘ygan. Yil oxirigacha kompaniya 100 millionta doza ishlab chiqarishi kerak edi, ammo unda ilk bosqichlarda xomashyo yetkazib berish bilan bog‘liq muammolar yuzaga keldi, shu sababli ikki marta kamroq doza ishlab chiqaradi.
Izoh (0)