Amerikalik sinovchi-uchuvchi Chak Yeger 7-dekabr kuni 97 yoshida vafot etdi. Bu haqda marhumning rafiqasi Viktoriya Yeger Twitter’dagi sahifasi orqali ma’lum qildi. Oilaning do‘sti Jon Nikoletti ushbu ma’lumotni The New York Times’ga tasdiqlagan.
Chak Yeger Ikkinchi jahon urushida ishtirok etgan professional uchuvchi hisoblanadi. U urush vaqtida jami 13 ta dushman samolyotini urib tushirgan. Yeger umri davomida 150 dan ortiq harbiy samolyotda parvoz qilgan bo‘lib, havoda o‘tkazgan vaqti umumiy hisobda 10 ming soatdan oshadi.
Yegerning eng mashhur parvozi 1947-yilning 14-oktabrida — Bell X-1 tajriba samolyotida tarixda birinchi bo‘lib tovushdan tez harakatlanganida amalga oshirilgan. Bu aka-uka Raytlarning 1903-yildagi parvozi va Charlz Lindbergning Atlantika okeani ustidan uchib o‘tgani (1927-yil) kabi aviatsiya tarixida muhim ahamiyatga ega.
Chak Yeger 1979-yilda chop etilgan Tom Vulfning The Right Stuff kitobi va shu nomda 1983-yilda suratga olingan filmdan so‘ng, AQShda mashhurlikka erishgan. Filmda Yeger rolini Sem Shepard ijro etgan.
Izoh (0)