Xitoyning Sinovac kompaniyasi vaksinasi Indoneziyada o‘tkazilgan sinovda 97 foiz samaradorlik ko‘rsatdi. Bu haqda South China Morning Post gazetasiga tayanib, “Interfaks” xabar berdi.
“Bizning klinik tadqiqotlar bo‘yicha guruhimizning bir oy ichida aniqlashicha, dastlabki ma’lumotlar 97 foiz hollarda samaradorlik ko‘rsatdi”, — degan Indoneziyaning Bio Farma farmatsevtika kompaniyasi vakili Ivan Setivian.
Indoneziya 7-dekabr kuni koronavirusga qarshi Sinovac vaksinasidan 1,2 million doza olgandi, yanvar oyida yana 15 million doza olishni rejalashtirmoqda.
Ayni paytda Xitoyning to‘rtta vaksinasi klinik sinovlarning uchinchi bosqichida. Ularning ikkitasi Sinopharm korporatsiyasi tomonidan, yana biri CanSinoBIO, to‘rtinchisi esa Sinovac kompaniyasi ishlab chiqmoqda.
Ma’lumot uchun, Sinovac Xitoydagi tadqiqot kompaniyasi bo‘lib, vaksina yaratish va uni sotishga ixtisoslashgan. Kompaniya rasmiy saytida ma’lum qilinishicha, Sinovac Xitoyda vaksina texnologiyasi sohasida 12 ta patentga ega.
Turkiya Xitoyning ushbu kompaniyasidan 50 million doza vaksina buyurtma qilgan.
Avvalroq Pfizer va BioNTech o‘zining BNT1622b vaksinasi tadqiqotlarining uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerikaning Moderna kompaniyasi vaksinasi — 94,1 foizga (kasallikning og‘ir shaklida esa 100 foizga), AstraZeneca kompaniyasi vaksinasi — 70 foizga baholangan.
Izoh (0)