Тошкентда 72 ва 148-йўналишда ҳаракатланувчи Mercedes ва Isuzu автобуслари йўловчи талашиб катта тезликда хавфли равишда ҳаракатлангани видеоси тарқалди.
Ҳодиса 4 декабрь, жума куни соат 07:48 да автомобилдаги видеорегистраторга қайд этилган. Тасвирда икки автобус бир-бирига жуда ҳам яқин масофада катта тезликда ҳаракат қилаётгани акс этган.
Видео якунида Isuzu автобуси Mercedesга олд ён тарафи билан урилганини кўриш мумкин.
Ижтимоий тармоқларда ҳодиса муҳокамаларга сабаб бўлган. Telegram каналларидан бирида ҳодисага қуйидагича изоҳ қолдирилган:
«ТШТХ («Тошшаҳартрансхизмат») 72-сонли йўналишда ҳаракатланувчи автобусни Юнусободга қайтариш кераклигини унутмаган бўлсангиз керак. Ёки сиз ҳали ҳам шахсий манфаатларни халқ манфаатларидан устун қўясизми?», — дейилади видеоизоҳида.
Тошкентда Isuzu автобуси симёғочга урилиши оқибатида беш киши жароҳатлангани, 116-йўналишда ҳаракатланувчи автобус ёниб кетгани ҳамда Самарқандда ичида 20 нафар йўловчи бўлган автобус асфальтнинг сирпанчиқлиги оқибатида ағдарилиб кетгани ҳақида хабар берилганди.
Изоҳ (0)