ОПЕК+ мамлакатлари 2021 йил бошидан нефть қазиб чиқаришни аста-секинлик билан кўпайтиришга келишиб олди. Бу ҳақда келишув иштирокчиларидан бири — Қозоғистон энергетика вазирлиги маълум қилди, деб ёзади Meduza.
Ҳозир ОПЕК+ мамлакатлари кунига базавий даражадан 7,7 миллион баррелга камроқ нефть ишлаб чиқармоқда. Январдан бошлаб умумий қазиб чиқариш кунига 500 минг баррелга оширилади ва шу тариқа, базавий даражадан 7,2 миллион баррелга кам бўлади.
Қозоғистон энергетика вазирлигида қайд этишларича, кейинроқ қазиб чиқариш ҳажми ҳар ойда қайта кўриб чиқилиши мумкин.
Россия энергетика вазири Александр Новак таъкидлашича, Россия умумий кўпайтириш доирасида нефть қазиб чиқаришни кунига 125 минг баррелга ошириш имкониятига эга бўлади.
ОПЕК+ мамлакатлари баҳорда нефть нархининг кескин тушиб кетиши фонида қазиб чиқариш ҳажмини рекорд даражада — кунига 9,7 миллион баррелга камайтириш ҳақида келишиб олган эди. Бу келишув уч ой амал қилди, шундан сўнг камайиш 7,7 миллион баррель даражасида қайд этилди.
Дастлаб январдан қисқариш 5,8 миллион баррелни ташкил этиши кўзда тутилган эди, аммо коронавируснинг иккинчи тўлқини ҳамда унинг натижасида ОПЕК+ мамлакатларида ишлаб чиқариш пасайиб кетиши фонида келишувни қайта кўриб чиқиб, қазиб чиқаришни бунчалик кескин оширмасликка қарор қилинди.
Изоҳ (0)