Pfizer kompaniyasi 2020-yil oxiriga qadar oldinroq rejalashtirilganidek koronavirusga qarshi vaksinaning 100 million emas, balki 50 million dozasinigina ishlab chiqara oladi. Bu haqda The Wall Street Journal vaksinani ishlab chiqarishga aloqador bo‘lgan manbasiga tayanib xabar berdi.
Aniqlanishicha, vaksinani ishlab chiqarishdagi ayrim mahsulotlari partiyasi sifat talabiga javob bermaydi. “Ushbu muammo hal etildi, biroq reja bo‘yicha yetkazib berishlarni amalga oshirish uchun vaqtimiz yetmaydi”, — deydi u.
Amerikaning Pfizer va Germaniyaning BioNTech kompaniyalari tomonidan yaratilgan vaksina bilan emlash ishlari ikki bosqichda amalga oshiriladi. Ya’ni 50 milllion doza vaksina 25 million kishini emlashga yetadi.
Avvalroq Pfizer va BioNTech o‘zining BNT1622b vaksinasi tadqiqotlarning uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Taqqoslash uchun: Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerika Moderna kompaniyasi vaksinasi — 94,1 foizga, AstraZeneca kompaniyasi vaksinasi — 70 foizga baholangan.
Pfizer va BioNTech vaksinani AQShda hamda Yevroittifoqda ro‘yxatdan o‘tkazish uchun ariza bergan. 2-dekabr kuni Buyuk Britaniya dunyoda birinchi bo‘lib Pfizer’ning koronavirusga qarshi vaksinasidan foydalanishni ma’qullagan.
Izoh (0)