Таниқли Ice Universe ники остидаги инсайдер Xiaomi’нинг навбатдаги флагмани 2020 йил охирига қадар намойиш этилишини маълум қилди. Афтидан, компания янги Snapdragon 888 процессорида ишлайдиган биринчи смартфонини тақдим этишга шошилмоқда, деб хабар беради Hi-Tech.Mail.ru.
Инсайдернинг сўзларига кўра, Мi 11 барча томонлари букилган дисплейга — «шаршара-экранга» эга бўлади. Бу каби технологиядан масалан, Huawei P40 Pro’да ҳам фойдаланилган. Олдинроқ тарқалган миш-мишларда Xiaomi флагманига QHD+ сифатини қўллаб қувватлайдиган ҳамда 120 герц янгиланиш частотасига эга дисплей ўрнатилиши маълум бўлганди.
Шунингдек, компания 200 мегапикселли камера ўрнатилган флагман прототипини синовдан ўтказаётгани тўғрисида гап-сўзлар тарқалган.
Мi 11’нинг батафсил техник тавсифи ёки нархи ҳақида ҳозирча маълумотлар йўқ. Агарда Xiaomi ростдан ҳам янги қурилмасини шу йилнинг охирига қадар тақдим этмоқчи бўлса, унинг тақдимоти санаси яқин кунларда эълон қилиши керак.
Эслатиб ўтамиз, жорий ҳафтада Xiaomi Россия бозори учун Мi 10Т ва Мi 10 Т Pro флагманларини тақдим этди — уларга 144 герцли экран ва Snapdragon 865 процессори ўрнатилган.
Аввалроқ Xiaomi янги смартфонини патентлагани, унинг фронтал камераси махсус механизмда жойлашгани тўғрисида хабар берилганди.
Изоҳ (0)