Moliya vazirligining 2021-yilgi davlat budjeti loyihasiga ko‘ra, 2021-yilda davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha jamg‘armaga 150 milliard so‘m ajratilishi kutilmoqda.
“Snos”lar ko‘lamidan kelib chiqilsa, bu miqdor juda ham kam, deb hisoblaydi deputat Rasul Kusherbayev. U O‘zLiDeP fraksiyasi yig‘ilishida moliya vaziri o‘rinbosari Ahadbek Haydarovga shu haqda savol berdi.
“Bu summa qayoqdan kelib chiqdi? Amaldagi real ehtiyojga qaraganda juda ham kam summa qo‘yilgan.
Masalan, Toshkent viloyatining bitta tumanini bilaman, shu tumanning o‘zida asosan tadbirkorlardan 100 milliard so‘m atrofida qarzdorlik bor. Pullar haligacha qoplab berilmagan. Joyini buzishga buzib tashlab, hali ham yotibdi... Bu yerdagi raqam respublika bo‘yicha 2 yoki 3 ta tumanni qoplaydi xolos.
Hokimliklar bilan qanchadan beri janjallashamiz, “pulimiz yo‘q” deyapti. Lekin joyini buzib bo‘lgan, nima qilsa qilgan.
Bu raqam qayerdan kelib chiqdi? Demak, bundan ko‘rinib turibdiki, kelasi yil davomida ham tadbirkorlar oldidagi qarzimizni uza olmas ekanmiz-da? U yerda oddiy fuqarolar ham bor. Bu aslida qanchadir trillion bo‘lishi kerak”, – dedi Rasul Kusherbayev.
Bunga javoban, moliya vaziri o‘rinbosari Ahadbek Haydarov 150 milliard so‘m “budjet imkoniyatidan kelib chiqib qo‘yilgani”ni aytdi.
“Yangi tartib ishlab chiqildi. Yangi tartibga ko‘ra, buzilishdan oldin ruxsat olinadi, yetarli mablag‘ bor bo‘lsa, keyin buziladi. Budjet imkoniyatidan kelib chiqib, 150 milliard mablag‘ qo‘yganmiz bu yo‘nalishga”, – dedi Ahadbek Haydarov.
https://youtu.be/O_1aAyTkgak?t=166
Avvalroq Toshkent shahar hokimligi sudlarda “snos” ishini ko‘rib chiqishda davlat organlarini boj to‘lashdan ozod qilishni taklif qilgani, MIB farg‘onalik tadbirkorning buzilgan do‘koni uchun hokimlikdan 148 million so‘m undirgani hamda tadbirkorlar faoliyatiga aralashgan uch viloyat hokimliklari va IIBlariga nisbatan ish qo‘zg‘atilgani haqida xabar berilgandi.
Izoh (0)