Молия вазирлигининг 2021 йилги давлат бюджети лойиҳасига кўра, 2021 йилда давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича жамғармага 150 миллиард сўм ажратилиши кутилмоқда.
«Снос»лар кўламидан келиб чиқилса, бу миқдор жуда ҳам кам, деб ҳисоблайди депутат Расул Кушербаев. У O‘zLiDeP фракцияси йиғилишида молия вазири ўринбосари Аҳадбек Ҳайдаровга шу ҳақда савол берди.
«Бу сумма қаёқдан келиб чиқди? Амалдаги реал эҳтиёжга қараганда жуда ҳам кам сумма қўйилган.
Масалан, Тошкент вилоятининг битта туманини биламан, шу туманнинг ўзида асосан тадбиркорлардан 100 миллиард сўм атрофида қарздорлик бор. Пуллар ҳалигача қоплаб берилмаган. Жойини бузишга бузиб ташлаб, ҳали ҳам ётибди... Бу ердаги рақам республика бўйича 2 ёки 3 та туманни қоплайди холос.
Ҳокимликлар билан қанчадан бери жанжаллашамиз, «пулимиз йўқ» деяпти. Лекин жойини бузиб бўлган, нима қилса қилган.
Бу рақам қаердан келиб чиқди? Демак, бундан кўриниб турибдики, келаси йил давомида ҳам тадбиркорлар олдидаги қарзимизни уза олмас эканмиз-да? У ерда оддий фуқаролар ҳам бор. Бу аслида қанчадир триллион бўлиши керак», – деди Расул Кушербаев.
Бунга жавобан, молия вазири ўринбосари Аҳадбек Ҳайдаров 150 миллиард сўм «бюджет имкониятидан келиб чиқиб қўйилгани»ни айтди.
«Янги тартиб ишлаб чиқилди. Янги тартибга кўра, бузилишдан олдин рухсат олинади, етарли маблағ бор бўлса, кейин бузилади. Бюджет имкониятидан келиб чиқиб, 150 миллиард маблағ қўйганмиз бу йўналишга», – деди Аҳадбек Ҳайдаров.
https://youtu.be/O_1aAyTkgak?t=166
Аввалроқ Тошкент шаҳар ҳокимлиги судларда «снос» ишини кўриб чиқишда давлат органларини бож тўлашдан озод қилишни таклиф қилгани, МИБ фарғоналик тадбиркорнинг бузилган дўкони учун ҳокимликдан 148 миллион сўм ундиргани ҳамда тадбиркорлар фаолиятига аралашган уч вилоят ҳокимликлари ва ИИБларига нисбатан иш қўзғатилгани ҳақида хабар берилганди.
Изоҳ (0)