Jinoyat ishlari bo‘yicha Andijon viloyat sudida shishadoshini bolta bilan urib o‘ldirgan B.S.ga sud hukmi o‘qildi. Bu haqda “Daryo”ga viloyat sudi sudya katta yordamchisi Komronshoh Rasulov ma’lum qildi.
Ta’kidlanishicha, 2020-yilning 30-may kuni fuqaro B.S. Oltinko‘l tumanidagi “Jalabek” mahallasi hududida joylashgan payvandlash ustaxonasida birga ishlayotgan sherigi B.T. bilan birga tushlik qilishi davomida spirtlik ichimlik ham iste’mol qilgan. Tushlikdan so‘ng ikkovlon tanishlari — U.E., A.M. va B.M.ni ustaxonaga taklif qilgan.
Bazm davomida chaqirilgan mehmonlardan biri B.M. mast bo‘lib qolib B.S. bilan tortishib qolgan va sherigini “maymun” deb haqorat qilgan. Tanishlarining ajratishiga qaramay B.S.ni haqorat qilishda davom etgan. Bu ham yetmagandek, uning yuz qismiga ikki marotaba urib, tan jarohati yetkazgan. Bundan jahli chiqqan B.S. esa ustaxonada turgan va o‘zi foydalanib kelgan bolta bilan B.M.ning yuz qismiga ikki marotaba urgan. Oqibatda B.M. tan jarohati olib, vafot etgan.
2020-yil 30-noyabr kuni mazkur ishni ko‘rib chiqqan sud B.S.ni Jinoyat kodeksining 97-moddasi 2-qismi “v” bandi (aybdorga ayon bo‘lgan ojiz ahvoldagi shaxsni qasddan o‘ldirish) bilan aybli deb topib, uni 17 yil-u 6 oy muddatga ozodlikdan mahrum qilgan. Shuningdek, B.S.ga Jinoyat kodeksining 96-moddasiga asosan jazoni o‘tashi davomida alkogolizmdan majburiy davolanish belgilangan.
Izoh (0)