Asakada 2020-yilning fevral oyida erini o‘ldirish uchun 50 ming AQSh dollariga odam yollagan 1984-yilda tug‘ilgan O.D. qo‘lga olingani haqida xabar berilgandi.
Holat yuzasidan jinoyat ishi qo‘zg‘atilib, olib borilgan tergov harakatlari davomida Jinoyat kodeksining 25,97-moddasi 2-qismi “i” bandi (qasddan odam o‘ldirishga tamagirlik niyatida suiqasd qilish) bilan sudga oshirilgan.
Biroq Jinoyat ishlari bo‘yicha Andijon viloyat sudi tomonidan sudlanuvchi O.D. harakatlari 25,97-moddasi 1-qismiga qayta kvalifikatsiya qilishdan tashqari Jinoyat kodeksining 57-moddasini (jinoyat uchun belgilangan jazoning eng kam qismidan ham kamroq jazo tayinlash) qo‘llagan holda 7 yil ozodlikdan mahrum qilish jazosi tayinlanib, belgilangan mazkur jazosi shartliga almashtirilgan va 2 yil sinov muddati berilishi natijasida ayol sud zalidan ozodlikka chiqarilgan.
“Xabar.uz”ning Bosh prokuratura matbuot xizmati rahbari Hayot Shamsutdinovga tayanib ma’lum qilishicha, mazkur jinoyat ishi Andijon viloyat prokuraturasining protesti va jabrlanuvchining shikoyati asosida JIB viloyat sudi apellyatsiya instansiyasida ko‘rib chiqildi.
Unga ko‘ra, sudlov hay’ati tomonidan viloyat prokurori protesti qisman qanoatlantirilishi natijasida birinchi bosqich sudi hukmi o‘zgartirildi. Ya’ni sudlanuvchiga nisbatan Jinoyat kodeksining 72-moddasi tartibida belgilangan 2 yil sinov muddati bekor qilinib, tayinlangan 7 yil ozodlikdan mahrum qilish jazosini o‘tashi belgilandi va u sud zalidan qamoqqa olindi.
Ma’lum qilinishicha, bu O.D.ning birinchi marta sudlanishi emas. Mahkuma 2010-yil tuhmat qilish va 2017-yilda o‘zboshimchalik ayblovlari bilan ikki marta sudlangan. Shuningdek, 2019-yil unga nisbatan qasddan badanga shikast yetkazish alomatlari bilan jinoyat ishi ham qo‘zg‘atilgan bo‘lib, faqat taraflarning yarashgani munosabati bilan ish tugatilgan.
Avvalroq erini o‘ldirib, jasad bo‘laklarini hojatxonaga tashlab yuborgan andijonlik ayol 10 yilga qamalgani hamda Andijonda erini o‘ldirish uchun 30 ming dollarga odam yollagan ayolga sud hukmi o‘qilgani haqida xabar berilgandi.
Izoh (0)