O‘zbekiston xalq ta’limi tizimida 2020-yilning 11 oyi davomida 70 milliard so‘mlik o‘g‘rilik va o‘zlashtirish holatlariga yo‘l qo‘yilgani aniqlandi, bu holatlarga yo‘l qo‘ygan 100 dan ortiq mas’ulga chora ko‘riladi. Bu haqda Xalq ta’limi vazirligining Ichki audit va moliyaviy nazorat boshqarmasi faoliyati natijalari to‘g‘risida navbatdan tashqari bo‘lib o‘tgan hay’at yig‘ilishida ma’lum qilindi.
Vazirlik tomonidan qayd etilishicha, 2019-yildan boshlab barcha hududiy Ichki audit va moliyaviy nazorat xizmati auditorlari vazirlikning markaziy apparati tarkibiga o‘tkazilib, ularning mustaqilligi ta’minlangan va ushbu xizmatni kuchaytirish ishlari amalga oshirilmoqda.
Yig‘ilishida vazirlikning Ichki audit va moliyaviy nazorat xizmati tomonidan amalga oshirilgan o‘rganish ishlari natijasida aniqlangan tizimdagi ta’lim muassasalarida ish haqidan o‘g‘rilik, o‘zlashtirish va ortiqcha to‘lovlarga yo‘l qo‘yganlik holatlari muhokama qilindi. Ma’lum bo‘lishicha, tizimda 2020-yilning o‘tgan 11 oyi davomida jami 69,8 milliard so‘m ish haqidan o‘g‘rilik, o‘zlashtirish va ortiqcha to‘lovlarga yo‘l qo‘yilgan.
Bundan tashqari, o‘tkazilgan o‘rganish natijalari bo‘yicha:
- 84,3 milliard so‘m ish haqi va unga tenglashtirilgan to‘lovlar bo‘yicha boshqa noqonuniy xarajatlar;
- 38,7 milliard so‘m “Davlat xaridlari to‘g‘risida”gi qonun talablariga zid ravishda amalga oshirilgan xaridlar;
- 24,1 milliard so‘m xatlov natijasida aniqlangan kamchiliklar;
- 3,9 milliard so‘m boshqa xato va kamchiliklar aniqlangan.
Misol uchun, Andijon viloyatining Andijon shahrida 20,4 milliard so‘m, Jizzax viloyati Zarbdor tumanida 7,8 milliard so‘m hamda Qashqadaryo viloyatining Chiroqchi tumanida 4,2 milliard so‘m naqd pul mablag‘lari hisoblangan ish haqiga nisbatan ortiqcha olinib, kassaga kirim qilinmagan va o‘zlashtirib yuborilgan.
Bundan tashqari, Andijon viloyatining Andijon shahrida 7,9 milliard so‘m, Sirdaryo viloyatining Boyovut tumanida 4,9 milliard so‘m, Samarqand viloyatining Payariq tumanida 3,2 milliard so‘m, Qashqadaryo viloyatining Dehqonobod tumanida 2,9 milliard so‘m, Qamashi tumanida 1,8 milliard so‘m hamda Andijon viloyatining Marhamat tumanida 0,9 milliard so‘m mablag‘ ishlamaydigan xodimlarga hamda ortiqcha ish haqi hisoblash orqali o‘zlashtirilgan.
O‘rganish natijalari bo‘yicha rasmiylashtirilgan 396 ta holat bo‘yicha 149 milliard so‘mlik hujjatlar to‘plami qonuniy chora ko‘rish uchun huquqni muhofaza qilish organlariga taqdim etilgan.
Shu bilan birga, amalga oshirilgan profilaktika ishlari natijasida 135 milliard so‘mlik moliyaviy xato va kamchiliklarning oldi olingan va bartaraf etilgan.
Amalga oshirilgan tadbirlar natijasi bo‘yicha o‘tkazilgan hay’at yig‘ilishi qarori bilan moliyaviy xato va kamchiliklarga yo‘l qo‘ygan 100 nafardan ortiq mas’ul xodimga tegishli intizomiy choralar ko‘rilishi, o‘zlashtirilgan mablag‘larni undirilishi yuzasidan tegishli choralar ko‘rish bo‘yicha ko‘rsatmalar berildi.
“O‘rganish natijasi bo‘yicha aniqlangan holatlarni bartaraf etish va ularni kelgusida takrorlamaslik yuzasidan Xalq ta’limi vazirligi tomonidan tegishli chora-tadbirlar rejasi ishlab chiqilgan va doimiy ravishda kameral nazorati olib borilmoqda”, — deyiladi vazirlik xabarida.
Izoh (0)