Shavkat Mirziyoyev 2-dekabr kuni O‘zbekistonda amaliy tashrif bilan bo‘lib turgan Rossiya prezidenti administratsiyasi rahbarining o‘rinbosari Dmitriy Kozak boshchiligidagi delegatsiyani qabul qildi.
Prezident matbuot xizmatining xabar berishicha, davlat rahbari oliy darajadagi samarali muloqot tufayli O‘zbekiston—Rossiya ko‘p qirrali hamkorligi keyingi yillarda jadal sur’at bilan rivojlanayotgani, strategik sheriklik va ittifoqchilik munosabatlari mustahkamlanib borayotganini mamnuniyat bilan qayd etdi.
Dmitriy Kozak Shavkat Mirziyoyevga samimiy qabul uchun minnatdorlik bildirib, Rossiya prezidenti Vladimir Putinning salomi va eng ezgu tilaklarini yetkazdi.
Bo‘lajak ikki tomonlama va ko‘p tomonlama formatdagi uchrashuvlarga tayyorgarlik ko‘rish va ularni o‘tkazish masalalari ko‘rib chiqildi. Ushbu tadbirlar kun tartibini aniq amaliy mazmun bilan boyitishga alohida e’tibor qaratildi.
Xalqaro siyosatning ayrim jihatlari yuzasidan ham fikr almashildi.
Eslatib o‘tamiz, 30-noyabr kuni Shavkat Mirziyoyev Vladimir Putin bilan telefon orqali muloqot qilib, 2020-yil dekabrida videoanjuman shaklida o‘tkazilishi rejalashtirilgan O‘zbekiston raisligidagi MDH sammitiga tayyorgarlik ko‘rish masalasini muhokama qilgan edi.
1-dekabr kuni O‘zbekiston dekabr oyida Yevrosiyo iqtisodiy ittifoqida (YeOII) kuzatuvchi-davlat maqomiga ega bo‘lishi haqida ma’lum bo‘lgandi.
Izoh (0)