Xorazm viloyatida 800 kvadrat metr yer maydonidan iborat qurilishi tugallanmagan uy-joyning oldi-sotdi shartnomasini bekor qilish haqidagi fuqarolik ishini ijobiy hal qilib berish evaziga pora olayotgan sudya qo‘lga olingan. Bu haqda Oliy sud matbuot xizmati rahbari Aziz Abidov “Daryo”ga ma’lum qildi.
Bundan avval Urganch tumanlararo sudi sudyasi pora sifatida kelishilgan 10 ming dollarning 1200 dollarini olayotgan vaqtida ashyoviy dalillar bilan qo‘lga olingani haqida xabar berilgan edi.
Oliy sudning ma’lum qilishicha, 2020-yil 3-oktabr kuni fuqaro X.R. Urganch tumanlararo sudining sudyasi A.S. qurilishi tugallanmagan uy-joyning oldi-sotdi shartnomasini bekor qilish haqidagi fuqarolik ishini hal qilib berish evaziga 10 ming dollar talab qilayotgani yuzasidan Xorazm viloyat prokurori nomiga ariza bilan murojaat qilgan.
Aniqlanishicha, Urganch tumanlararo sudining sudyasi A.S. arizachining da’vo arizasi asosida fuqarolik ishlari bo‘yicha Bog‘ot tumanlararo sudining sudyasi J.M. tomonidan ko‘rib chiqilayotgan javobgar G.M.ga nisbatan Xiva shahrida joylashgan 800 kvadrat metr yer maydonidan iborat qurilishi tugallanmagan uy-joyning oldi-sotdi shartnomasini bekor qilish haqidagi fuqarolik ishini sudya J.M.ga pora bergan holda ijobiy hal qilib berish evaziga 10 ming dollar so‘ragan.
Arizaga asosan o‘tkazilgan tezkor tadbirda fuqarolik ishlari bo‘yicha Urganch tumanlararo sudining sudyasi A.S. fuqaro X.R. dan talab qilingan 10 ming dollardan kimyoviy ishlov berilgan 1 200 dollarini olgan vaqtida, ashyoviy dalillar bilan jinoyat ustida ushlangan.
Sudyalar oliy kengashining A.S.ni Jinoyat kodeksining 168-moddasi (firibgarlik) 3-qismi “a” (ko‘p miqdorda), “v” (xizmat mavqeyidan foydalanib sodir etilgan) bandi va 28, 211-moddasi (pora berish) 2-qismi “b” (ko‘p miqdorda) bandi bilan jinoiy javobgarlikka tortishga rozilik berish to‘g‘risidagi xulosasi berilgan. Shuningdek, Oliy sud Plenumining A.S.ni jinoiy javobgarlikka tortish va qamoqqa olishga rozilik berish to‘g‘risida qarori chiqarilgan.
Sudyalar oliy kengashining qarori bilan A.S. lavozimidan ozod etilib, vakolati muddatidan ilgari tugatilgan. Hozirgi kunda ushbu jinoyat ishi yuzasidan tergov harakatlari olib borilmoqda.
Avvalroq Toshkent viloyatida ozodlikni cheklash jazosini o‘tayotgan shaxsning ziyofatida qatnashgan sudyalar jarimaga tortilgan va lavozimi pasaytirilgani hamda Toshkentda YPX xodimini kaltaklagan ikki sudya lavozimidan olinib, sherigiga hayfsan berilgani ma’lum qilingan edi.
Izoh (0)