Toshkentda 5 mingga yaqin soxta qaror chiqargan sudyalar ustidan qo‘zg‘atilgan jinoyat ishi bo‘yicha sud 11-dekabr kuni boshlanadi

Toshkent shahar ma’muriy sudi sudyalari va yordamchilari tomonidan 5 mingga yaqin soxta qaror chiqarilgani va 8 milliard so‘m davlat mablag‘i talon-toroj qilingani haqida avvalroq xabar berilgandi. Oliy sudi matbuot xizmati rahbari Aziz Obidov mazkur holat bo‘yicha “Daryo”ga izoh berdi.

“Toshkent shahar ma’muriy sudining bir nechta sudyalari va ularning yordamchilari Toshkent shahar Ichki ishlar bosh boshqarmasi Yo‘l harakati xavfsizligi boshqarmasi ma’muriy amaliyot bo‘limi xodimlari bilan oldindan jinoiy til biriktirgan. Ular yo‘l harakati qoidalari buzilganligi yuzasidan tuzilgan ma’muriy ishlarni kirim qilmasdan, taraflar ishtirokida ko‘rib chiqmasdan va ayrim ma’muriy ishlarni qasddan yo‘qotib, 5 mingga yaqin soxta qaror chiqargan”, — deya ma’lum qilgandi Korrupsiyaga qarshi kurashish agentligi direktori o‘rinbosari Umida To‘xtasheva.

Aziz Obidovning xabar berishicha, jinoyat ishlari bo‘yicha Toshkent shahar sudining sudyasi lavozimida ishlagan D.Sh., jinoyat ishlari bo‘yicha Toshkent shahar sudining sudyasi katta yordamchisi vazifasida ishlagan A.S., Yashnobod tuman ma’muriy sudining sudya yordamchisi vazifasida ishlagan B.T., Toshkent shahar IIBB YHXB xodimlari I.H., A.T., Sh.M., B.A., T.H. va U.S. Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va boshqa moddalari bilan ayblanmoqda.

Ularga oid jinoyat ishi hozirgi kunda jinoyat ishlari bo‘yicha Zangiota tumani sudining ish yurituvida bo‘lib, ushbu ishni ko‘rish 2020-yil 11-dekabr kuni boshlanadi.

Oliy sud vakilining ma’lum qilishicha, mazkur jinoyat ishi yuzasidan dastlabki tergov davrida aniqlangan 3 353 456 647 so‘m moddiy zarardan 2 991 456 647 so‘mi qoplangan.