Ўзбекистон халқ таълими тизимида 2020 йилнинг 11 ойи давомида 70 миллиард сўмлик ўғрилик ва ўзлаштириш ҳолатларига йўл қўйилгани аниқланди, бу ҳолатларга йўл қўйган 100 дан ортиқ масъулга чора кўрилади. Бу ҳақда Халқ таълими вазирлигининг Ички аудит ва молиявий назорат бошқармаси фаолияти натижалари тўғрисида навбатдан ташқари бўлиб ўтган ҳайъат йиғилишида маълум қилинди.
Вазирлик томонидан қайд этилишича, 2019 йилдан бошлаб барча ҳудудий Ички аудит ва молиявий назорат хизмати аудиторлари вазирликнинг марказий аппарати таркибига ўтказилиб, уларнинг мустақиллиги таъминланган ва ушбу хизматни кучайтириш ишлари амалга оширилмоқда.
Йиғилишида вазирликнинг Ички аудит ва молиявий назорат хизмати томонидан амалга оширилган ўрганиш ишлари натижасида аниқланган тизимдаги таълим муассасаларида иш ҳақидан ўғрилик, ўзлаштириш ва ортиқча тўловларга йўл қўйганлик ҳолатлари муҳокама қилинди. Маълум бўлишича, тизимда 2020 йилнинг ўтган 11 ойи давомида жами 69,8 миллиард сўм иш ҳақидан ўғрилик, ўзлаштириш ва ортиқча тўловларга йўл қўйилган.
Бундан ташқари, ўтказилган ўрганиш натижалари бўйича:
- 84,3 миллиард сўм иш ҳақи ва унга тенглаштирилган тўловлар бўйича бошқа ноқонуний харажатлар;
- 38,7 миллиард сўм «Давлат харидлари тўғрисида»ги қонун талабларига зид равишда амалга оширилган харидлар;
- 24,1 миллиард сўм хатлов натижасида аниқланган камчиликлар;
- 3,9 миллиард сўм бошқа хато ва камчиликлар аниқланган.
Мисол учун, Андижон вилоятининг Андижон шаҳрида 20,4 миллиард сўм, Жиззах вилояти Зарбдор туманида 7,8 миллиард сўм ҳамда Қашқадарё вилоятининг Чироқчи туманида 4,2 миллиард сўм нақд пул маблағлари ҳисобланган иш ҳақига нисбатан ортиқча олиниб, кассага кирим қилинмаган ва ўзлаштириб юборилган.
Бундан ташқари, Андижон вилоятининг Андижон шаҳрида 7,9 миллиард сўм, Сирдарё вилоятининг Боёвут туманида 4,9 миллиард сўм, Самарқанд вилоятининг Пайариқ туманида 3,2 миллиард сўм, Қашқадарё вилоятининг Деҳқонобод туманида 2,9 миллиард сўм, Қамаши туманида 1,8 миллиард сўм ҳамда Андижон вилоятининг Марҳамат туманида 0,9 миллиард сўм маблағ ишламайдиган ходимларга ҳамда ортиқча иш ҳақи ҳисоблаш орқали ўзлаштирилган.
Ўрганиш натижалари бўйича расмийлаштирилган 396 та ҳолат бўйича 149 миллиард сўмлик ҳужжатлар тўплами қонуний чора кўриш учун ҳуқуқни муҳофаза қилиш органларига тақдим этилган.
Шу билан бирга, амалга оширилган профилактика ишлари натижасида 135 миллиард сўмлик молиявий хато ва камчиликларнинг олди олинган ва бартараф этилган.
Амалга оширилган тадбирлар натижаси бўйича ўтказилган ҳайъат йиғилиши қарори билан молиявий хато ва камчиликларга йўл қўйган 100 нафардан ортиқ масъул ходимга тегишли интизомий чоралар кўрилиши, ўзлаштирилган маблағларни ундирилиши юзасидан тегишли чоралар кўриш бўйича кўрсатмалар берилди.
«Ўрганиш натижаси бўйича аниқланган ҳолатларни бартараф этиш ва уларни келгусида такрорламаслик юзасидан Халқ таълими вазирлиги томонидан тегишли чора-тадбирлар режаси ишлаб чиқилган ва доимий равишда камерал назорати олиб борилмоқда», — дейилади вазирлик хабарида.
Изоҳ (0)