Xorazm viloyati Urganch tumanlararo sudi sudyasi pora bilan qo‘lga tushdi. Bu haqda 30-noyabr kuni O‘zbekiston Oliy sudida bo‘lib o‘tgan konferensiyada Korrupsiyaga qarshi kurashish agentligi direktori o‘rinbosari Umida To‘xtasheva ma’lum qildi, deya xabar bermoqda “Daryo” muxbiri Musulmonbek Ibrohimov.
Anjumanda Umida To‘xtasheva sud tizimida sodir etilayotgan korrupsion xatti-harakatlarning eng xavflisi pora olish-berish bilan bog‘liq jinoyatlar ekanligini ta’kidlab, Xorazm viloyatida sudyaning pora bilan ushlanganini misol qilib keltirdi.
“Oktabr oyida Urganch tumanlararo sudi sudyasi pora sifatida kelishilgan 10 ming dollarning 1200 dollarini olayotgan vaqtida ashyoviy dalillar bilan qo‘lga olingan”, – dedi agentlik vakili.
Konferensiya ishida Umida To‘xtasheva sud tizimida sodir etilayotgan korrupsion holatlar haqida to‘xtalib, mast sudyaning yo‘l-patrul xizmati xodimiga qarshilik qilgani, ma’muriy sudya tomonidan 8 milliard so‘m talon-toroj qilingani va ozodlikdan cheklangan shaxsning ziyofatida qatnashgan sudya ko‘p o‘tmay uni ozodlikka chiqargani haqida ma’lumotlar taqdim etdi.
Izoh (0)