Namanganlik sportchi va volontyor Gulsanam Alijonova Toshkentda o‘tkazilgan taekvondo WTF bo‘yicha O‘zbekiston chempionati g‘olibi bo‘ldi. Bu haqda “Daryo” muxbiri Azizbek Abduvaliyev xabar bermoqda.
Gulsanam Alijonova 73 kilogramm vazn toifasida barcha raqiblaridan ustun keldi. Finalda o‘tgan yilgi chempion Diyora G‘ofurjonovaning yengib, shohsupaga ko‘tarildi.
—2018 yilgi mamlakat chempionatida sovrindor bo‘lgandim. Yaratganga shukr, bu yil g‘olib bo‘lish nasib etdi. Oltin medalimni onamga bag‘ishlayman, chunki chempion bo‘lishimda murabbiylarim qatori u kishining xizmati juda katta, — deydi Gulsanam.
Alijonova endigi asosiy maqsadi 2024-yili Fransiyada bo‘ladigan Olimpiada o‘yinlarida ishtirok etish va oltin medalni qo‘lga kiritish ekanligini aytmoqda.
Eslatib o‘tamiz, Namanganda ikki erkakni do‘pposlagani uchun 2020-yilning 8-sentabr kuni 23 yoshli Alijonovaga nisbatan tergov ishi qo‘zg‘atilganligi aytilgandi. Biroq hodisa jamoatchilik diqqatiga tushib, ko‘pchilik qizni yoqlab chiqdi. Alijonova pandemiya davrida volontyorlik ishlari bilan shug‘ullangani ma’lum bo‘ldi. Saida Mirziyoyeva ham fikrini bildirdi.
Shundan keyin Yoshlar ishlari agentligi viloyat boshqarmasi jinoyat ishi yuzasidan viloyat prokuraturasiga jazoni yengillashtirish bo‘yicha amaliy yordam so‘rab murojaat qildi, Yoshlar ittifoqi esa qizni kafillikka oldi. Shu tariqa taekvondochi qizga qarshi qo‘zg‘atilgan jinoyat ishi tugatilgandi.
Mavzuga doir: Gulsanam Alijonova: Bo‘lib o‘tgan ishlardan xulosa chiqardim. Endi bor e’tiborimni sportga qarataman
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)