Хоразм вилояти Урганч туманлараро суди судьяси пора билан қўлга тушди. Бу ҳақда 30 ноябрь куни Ўзбекистон Олий судида бўлиб ўтган конференцияда Коррупцияга қарши курашиш агентлиги директори ўринбосари Умида Тўхташева маълум қилди, дея хабар бермоқда «Дарё» мухбири Мусулмонбек Иброҳимов.
Анжуманда Умида Тўхташева суд тизимида содир этилаётган коррупцион хатти-ҳаракатларнинг энг хавфлиси пора олиш-бериш билан боғлиқ жиноятлар эканлигини таъкидлаб, Хоразм вилоятида судьянинг пора билан ушланганини мисол қилиб келтирди.
«Октябрь ойида Урганч туманлараро суди судьяси пора сифатида келишилган 10 минг долларнинг 1200 долларини олаётган вақтида ашёвий далиллар билан қўлга олинган», – деди агентлик вакили.
Конференция ишида Умида Тўхташева суд тизимида содир этилаётган коррупцион ҳолатлар ҳақида тўхталиб, маст судьянинг йўл-патруль хизмати ходимига қаршилик қилгани, маъмурий судья томонидан 8 миллиард сўм талон-торож қилингани ва озодликдан чекланган шахснинг зиёфатида қатнашган судья кўп ўтмай уни озодликка чиқаргани ҳақида маълумотлар тақдим этди.
Изоҳ (0)