Toshkent viloyatining Yangiyo‘l tumanidagi xonadonlarning birida gaz portlashi oqibatida ikki kishi halok bo‘lgani haqida xabar berilgan edi.
Bosh prokuratura matbuot xizmatining xabar berishicha, holat yuzasidan Yangiyo‘l tumani prokuraturasi tomonidan Jinoyat kodesksining 258-moddasi (tog‘-kon, qurilish yoki portlatish ishlari xavfsizligi qoidalarini buzish) bilan jinoyat ishi qo‘zg‘atildi.
Tergov harakatlari olib borilmoqda.
Eslatib o‘tamiz, holat 30-noyabr kuni yuz bergan. Uning oqibatida uyning bir qismi qulab, xonadon egalari vayronalar ostida qolgandi. Uydan 36 yoshli I.S., 33 yoshli I.N., 14 yoshli I.R. va 11 yoshli I.S. olib chiqilib, tibbiyot muassasasiga yuborilgan.
Biroq ko‘rsatilgan yordamga qaramay I.S. va I.R. vafot etgan, I.N. va 11 yoshli I.S. turli darajada tan jarohatlarini olgan.
Gaz portlashining asosiy sababi sifatida tabiiy gazdan foydalanish qoidalarining buzilishi taxmin qilinmoqda.
Avvalroq Qibraydagi xonadonda gaz portlashi oqibatida uy egasi va uning o‘g‘li halok bo‘lgani to‘g‘risida xabar berilgandi. Holat yuzasidan jinoyat ishi qo‘zg‘atilgan. Shu yilning aprel oyida Samarqand viloyatining Kattaqo‘rg‘on shahrida aholi yashovchi ko‘p qavatli uyda portlash sodir bo‘lgan, oqibatda uch kishi halok bo‘lgandi.
Izoh (0)