Ijtimoiy tarmoqlarda Samarqand viloyati Oqdaryo tumanida joylashgan bozor deb taxmin qilinayotgan savdo joyining video va suratlari tarqatildi. Tasvirlarda sotuvchilar loyga aylangan yerda savdo qilayotgani aks etgan.
Mazkur holat yuzasidan Oqdaryo tumani hokimligi rasmiy munosabat bildirib o‘tdi. Unga ko‘ra, tasvirlarda ko‘rsatilgan hudud Oqdaryo buyum bozori emas, aksincha yangi dehqon bozori qurilishi uchun ajratilgan hudud hisoblanadi.
“Ayni vaqtda hududda obodonlashtirish ishlari olib borildi, suv to‘planib qolgan joylarga shag‘al tosh yotqizilib, ko‘rsatilgan kamchiliklar to‘liq bartaraf etildi”, – deyiladi hokimlik xabarida.
Oqdaryo tumani hokimi o‘rinbosari Bobomurod Aralovning ma’lum qilishicha, hozirda muammo bartaraf qilingan.
“Tadbirkorlar buyum bozorida bo‘sh do‘konlar bo‘la turib, tasvirdagi joyda o‘zboshimchalik bilan savdo qilgan. Bugunning o‘zida suv bosgan noqonuniy qurilishlarni bartaraf qildik. Chiqindilarning hammasini tozaladik. Bu, aslida, dehqon bozor qurilishi uchun tayyorlangan maydon hisoblanadi.
Noqonuniy qurilishlarni buzayotganimiz sababli bir muddat ishimiz to‘xtab qolgandi. Aslida, bu maydonda dehqon bozor qurilishi rejalashtirilgan”, – deydi hokim o‘rinbosari.
Oqdaryo tumani savdo kompleksi rahbari To‘lqin Yoqubovning ta’kidlashicha, tuman savdo kompleksida jami 177 ta do‘kon mavjud. Shundan 100 tasi faoliyat olib bormoqda, qolgani bo‘sh turibdi.
“O‘sha yerda savdo qilgan tadbirkorlarimiz bo‘sh turgan do‘konlarimizga kelsa, bemalol joylashishi mumkin. Hamma shart-sharoitlar bor. Muammolari yo‘q”, – deydi savdo kompleksi rahbari.
Tuman Davlat soliq inspeksiyasi rahbari Javlon Yodgorov tarqalgan video bo‘yicha quyidagicha izoh berdi.
“Har yakshanba kuni ko‘chma savdoga yo‘l qo‘yilgan. Borib o‘rganilganda u joy yangi bozor qurilishiga ajratilgan, hali bitib tugallanmagan joy. Qurilish hali ham ketmoqda. Endi har yakshanba butun inspeksiya jamoasini u yerga jalb qilib, muammoni to‘liq bartaraf etib, tadbirkorlarni ichkariga kiritishni ta’minlaymiz”, – deydi Javlon Yodgorov.
Avvalroq Oqdaryodagi buyum bozorida yong‘in sodir bo‘lgandi. Yong‘in kiyim-kechaklar va boshqa buyumlar bo‘lgan savdo do‘konlarini qamrab olgandi.
Izoh (0)