Ижтимоий тармоқларда Самарқанд вилояти Оқдарё туманида жойлашган бозор деб тахмин қилинаётган савдо жойининг видео ва суратлари тарқатилди. Тасвирларда сотувчилар лойга айланган ерда савдо қилаётгани акс этган.
Мазкур ҳолат юзасидан Оқдарё тумани ҳокимлиги расмий муносабат билдириб ўтди. Унга кўра, тасвирларда кўрсатилган ҳудуд Оқдарё буюм бозори эмас, аксинча янги деҳқон бозори қурилиши учун ажратилган ҳудуд ҳисобланади.
«Айни вақтда ҳудудда ободонлаштириш ишлари олиб борилди, сув тўпланиб қолган жойларга шағал тош ётқизилиб, кўрсатилган камчиликлар тўлиқ бартараф этилди», – дейилади ҳокимлик хабарида.
Оқдарё тумани ҳокими ўринбосари Бобомурод Араловнинг маълум қилишича, ҳозирда муаммо бартараф қилинган.
«Тадбиркорлар буюм бозорида бўш дўконлар бўла туриб, тасвирдаги жойда ўзбошимчалик билан савдо қилган. Бугуннинг ўзида сув босган ноқонуний қурилишларни бартараф қилдик. Чиқиндиларнинг ҳаммасини тозаладик. Бу, аслида, деҳқон бозор қурилиши учун тайёрланган майдон ҳисобланади.
Ноқонуний қурилишларни бузаётганимиз сабабли бир муддат ишимиз тўхтаб қолганди. Аслида, бу майдонда деҳқон бозор қурилиши режалаштирилган», – дейди ҳоким ўринбосари.
Оқдарё тумани савдо комплекси раҳбари Тўлқин Ёқубовнинг таъкидлашича, туман савдо комплексида жами 177 та дўкон мавжуд. Шундан 100 таси фаолият олиб бормоқда, қолгани бўш турибди.
«Ўша ерда савдо қилган тадбиркорларимиз бўш турган дўконларимизга келса, бемалол жойлашиши мумкин. Ҳамма шарт-шароитлар бор. Муаммолари йўқ», – дейди савдо комплекси раҳбари.
Туман Давлат солиқ инспекцияси раҳбари Жавлон Ёдгоров тарқалган видео бўйича қуйидагича изоҳ берди.
«Ҳар якшанба куни кўчма савдога йўл қўйилган. Бориб ўрганилганда у жой янги бозор қурилишига ажратилган, ҳали битиб тугалланмаган жой. Қурилиш ҳали ҳам кетмоқда. Энди ҳар якшанба бутун инспекция жамоасини у ерга жалб қилиб, муаммони тўлиқ бартараф этиб, тадбиркорларни ичкарига киритишни таъминлаймиз», – дейди Жавлон Ёдгоров.
Аввалроқ Оқдарёдаги буюм бозорида ёнғин содир бўлганди. Ёнғин кийим-кечаклар ва бошқа буюмлар бўлган савдо дўконларини қамраб олганди.
Изоҳ (0)