Tuzatish: Xabarning dastlabki tahririda “Qozog‘istonda ham O‘zbekistondan yuborilgan pomidorlarda virus aniqlandi” mazmunida sarlavha berilgan edi. Bu noto‘g‘ri — Qozog‘iston O‘zbekistondan import qilingan pomidor va boshqa sabzavotlarda hozircha ToBRFV virusini aniqlamagan, faqat vaziyatni kuzatib, tekshiruv ishlarini olib borishni maqsad qilgan. Xato axborot berilgani uchun “Daryo” tahririyati mushtariylardan uzr so‘raydi.
Avvalroq, 26-noyabr kuni Rossiya tomoni Farg‘ona viloyatida yetishtirilgan pomidor va bulg‘or qalampirining olib kirilishiga vaqtinchalik cheklov joriy etgan edi. “Rosselxoznadzor”ning aniqlik kiritishicha, bunga mahsulotlarda ToBRFV (tomato brown rugose fruit virus) virusi topilgani sabab bo‘lgan.
“Pomidorlarda jigarrang burishgan virusi topilgani sababli 26-noyabrdan e’tiboran Farg‘ona viloyatida yetishtirilgan pomidor va bulg‘or qalampirlarini Rossiyaga olib kirish taqiqlandi. Hozirda biz Qozog‘iston issiqxona xo‘jaliklari uchun yuzaga kelishi mumkin bo‘lgan ehtimoliy xavf va tahdidlar bo‘yicha joriy vaziyat tahlilini o‘rganyapmiz, o‘rganish yakunlariga ko‘ra tegishli qaror qabul qilinadi”, — deyiladi Qozog‘iston Qishloq xo‘jaligi vazirligi axborotida.Qayd etish joiz, Rossiya vaqtinchalik taqiqni joriy etganini e’lon qilgach, O‘zbekiston Investitsiyalar va tashqi savdo vazirligi “Rosselxoznadzor” bilan mazkur masala bo‘yicha maslahatlashuvlar o‘tkazayotganini ma’lum qilgan edi. “O‘zdavkarantin” ham vaziyatni o‘rganmoqda.
Ta’kidlanishicha, ToBRFV o‘simliklar virusining yangi shtammi bo‘lgani uchun O‘zbekiston hududida ilgari aniqlanmagan. YeOII mamlakatlarida (Rossiya va Qozog‘iston ushbu ittifoq a’zosi hisoblanadi) ham ushbu virusga nisbatan taqiq mavjud emas — Yevrosiyo Iqtisodiy komissiyasi kengashining 2016-yil 30-noyabrdagi qarori bilan tasdiqlangan karantin obyektlari yagona ro‘yxatiga ToBRFV kiritilmagan.
Ma’lumot uchun, jigarrang burishgan virusi (ToBRFV)ning inson hayotiga ta’siri haqida hozircha hech narsa aniqlanmagan, ammo u issiqxona xo‘jaliklarida 30 foizdan 70 foizgacha hosilni yo‘qotishga olib kelishi mumkin. Pomidor va bulg‘or qalampirini zararlovchi bu virus birinchi marta 2014-yili Isroilda aniqlangan, keyinchalik Meksika, Italiya, Xitoyda ham qayd etilgan. 2019-yil iyunida virus Turkiyada ham topilgan edi.
Izoh (0)