Amerika prezidenti Donald Tramp Newsmax nashriga bergan intervyusida, u “tegishli hududlar”ga yuborgan ikkita yadro suv osti kemasi endi Rossiyaga yaqinroq joyda suzayotganini aytdi.
1-avgust, juma kuni Donald Tramp Rossiya xavfsizlik kengashi raisi o‘rinbosari Dmitriy Medvedev (sobiq prezident)ning “o‘ta provokatsion bayonotlari” munosabati bilan AQSHning ikkita yadroviy suv osti kemasini “tegishli hududlar”ga joylashtirishni buyurgan edi.
“Rossiyaning sobiq prezidenti, hozirda Rossiya Xavfsizlik kengashi raisi o‘rinbosari lavozimida faoliyat yuritayotgan Dmitriy Medvedevning nihoyatda provokatsion bayonotlariga asoslanib, men ikkita atom suvosti kemasini tegishli hududlarga joylashtirishni buyurdim. Bu ahmoqona va gijgijlovchi bayonotlar quruq gap bo‘lmasligi ham mumkin. So‘zlar katta ahamiyatga ega va ko‘pincha kutilmagan oqibatlarga olib keladi. Umid qilamanki, bu holat shundaylardan biri emas”, deb yozdi Tramp.
Eslatib o‘tamiz, Trampning Ukrainada urushni to‘xtatish bo‘yicha Rossiyaga ultimatumiga javoban Medvedev AQSHga yadroviy zarba berilish ehtimoliga ishora qilgan edi.
Tramp va Medvedevning yozishmalari
28-iyul kuni Medvedev X ijtimoiy tarmog‘ida Rossiyaga qarshi sanksiyalar tarafdori bo‘lgan amerikalik senator Lindsi Grem bilan janjallashib qoldi. Gap shundaki, Oq uy rahbarining Ukrainaga oid kelishuvlarga erishish muddatini 50 kundan 10 kunga qisqartirish bo‘yicha yangi ultimatumini Medvedev “tahdid va urush sari qadam” deb baholagan. Shuningdek, u o‘z postida Tramp va Gremni “qariyalar” deb masxara qilgan.
Bunga javoban Tramp 31-iyul kuni Truth Social tarmog‘ida Rossiya va uning eng yirik neft importchilaridan biri hisoblangan Hindistonning iqtisodini “o‘lik” deb atagan. Shu bilan birga, AQSH prezidenti Medvedevni “hali ham o‘zini prezident deb hisoblaydigan, omadsiz sobiq prezident” ekanini aytib, og‘ziga ehtiyot bo‘lishini maslahat bergan.
Shundan so‘ng Medvedev Rossiya — bu Isroil yoki Eron emasligini, unga ultimatumlar qo‘yib bo‘lmasligini va har qanday talab urush sari tashlangan qadam ekanini yozdi.
“Bu urush Rossiya va Ukraina o‘rtasida emas, balki u (Tramp)ning o‘z mamlakati bilan bo‘ladi. Uxlayotgan Jo yo‘lidan bormang”, deb ogohlantirgan Medvedev AQSHning sobiq prezidenti Jo Baydenga ishora qilgan holda.
Izoh (0)