Kadastr sohasidan ishdan ketgan sobiq xodimlar orasida odamlarning ishonchiga kirib firibgarlik yo‘li bilan boylik orttirmoqchi bo‘lganlar talaygina. Bu haqda Kadastr agentligi direktori o‘rinbosari Mirsaid Mirmaqsudov jurnalistlar bilan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda ma’lum qilinishicha, yil boshidan buyon xodimlar bilan bog‘liq 21 ta korrupsion holat aniqlangan. 2020-yilning 1-iyunidan 18-noyabrigacha bo‘lgan vaqt mobaynida 12 nafar xodimga nisbatan jinoyat ishi qo‘zg‘atilgan.
“Eng achinarli tomoni shundaki aksariyat korrupsion holatlar kadastrning sobiq xodimlari tomonidan sodir etilmoqda. Ishdan ketganiga bir necha yil bo‘lgan bo‘lsa-da, odamlarning ishonchiga kirib firibgarlik yo‘li bilan boylik orttirmoqchi bo‘lganlar talaygina”, – dedi Mirsaid Mirmaqsudov.
Ma’lumot uchun, 2019-yilda tizimidagi 54 nafar xodimga nisbatan jinoyat ishi qo‘zg‘atilgan, 62 nafar xodim firibgarlik jinoyati bilan qo‘lga olingan.
Eslatib o‘tamiz, O‘zbekiston Prezidenti huzurida 15-oktabr kuni o‘tkazilgan yig‘ilishda Toshkent shahar hokimligi qoshidagi kapital qurilish bosh boshqarmasi boshlig‘i o‘rinbosari, Chilonzor tumanidagi investitsiyalar va tashqi savdo bo‘limi boshlig‘i, Qibray, Chilonzor, Buvayda, Oqqo‘rg‘on, Bo‘stonliq tumani hokimining o‘rinbosari, Marhamat tumani hokimi yordamchisi yer maydonini sotayotgan vaqtida jinoyat ustida qo‘lga olingani aytib o‘tilgan.
Izoh (0)