Toshkent shahri bosh imom xatibi o‘rinbosari vazifasida ishlab kelayotgan Jasur Raupov Toshkent viloyati bosh imom-xatibi lavozimiga tayinlandi, deya xabar bermoqda O‘zbekiston musulmonlari idorasi.
Ma’lum qilinishicha, 30-noyabr kuni Toshkent viloyati imom-xatiblari yig‘ilishi bo‘lib o‘tdi. Unda idora raisi muftiy Usmonxon Alimov, Din ishlari bo‘yicha qo‘mita raisi Abdug‘ofur Ahmedov, diniy idora ish boshqaruvchisi Rustam Jamilov, masjidlar bo‘limi mudiri Muhammadnazar Qayumov va taniqli imom-xatiblar ishtirok etgan.
Yig‘ilishda tashkiliy masala ko‘rilgan, Toshkent shahri bosh imom-xatibi o‘rinbosari vazifasida ishlab kelayotgan Jasur domla Raupov Toshkent viloyati bosh imom-xatibi lavozimiga tayinlangan.
Ma’lumot o‘rnida, Jasur domla Raupov Imom Buxoriy nomidagi Toshkent islom instituti va Andijon davlat universitetini tamomlagan. 1999-yildan boshlab Toshkentdagi bir necha masjidlarda imom-xatib vazifalarida ishlagan. Xususan, 2017–2019-yillarda “Islom ota” masjidi imom-xatibi vazifasida ishlagan, 2019-yil dekabrida Chilonzor tumanidagi “Nosirxon” jome masjidi imom-xatibi vazifasiga o‘tkazilgandi.
U 2010-yildan buyon Toshkent shahar bosh imom xatibi o‘rinbosari lavozimida ham faoliyat yuritib kelgan.
Eslatib o‘tamiz, avvalgi viloyat bosh imom-xatibi lavozimida ishlagan Xayrulloh Turmatov 16-sentabr kuni 44 yoshida vafot etgan edi.Avvalroq “Shayx Zayniddin” jome masjidi imom-xatibi “Vaqf” fondiga rahbar etib tayinlangani haqida xabar berilgandi.
Izoh (0)