Angrenda ammasining qizini himoya qilgan yigit uch kishi tomonidan kaltaklandi

Toshkent viloyati Angren shahrida ammasining qiziga gapirgan yigitni urgan fuqaroni uch nafar kishi kaltaklab ketdi, deya xabar bermoqda Tergov departamenti. Qayd etilishicha, 19 yoshli Husniddin O. fuqaro Jamshidning ammasining qiziga gapirganligi sababli, 2020-yilning 17-noyabr kuni o‘zaro janjallashgan vaqtida, Jamshid fuqaro Husniddin O.ning yuziga tarsaki tushirgan. Shundan so‘ng, 2020-yilning 18-noyabr kuni soat 13:00 da, Husniddin O. o‘zining qarindoshlari 21 yoshli Zuhriddin O. va 18 yoshli Baxtiyor A.lar bilan birga o‘ch olish maqsadida, Angren shahar “Ibn Sino” mahallasida joylashgan “Nur” to‘yxonasining orqa qismida, tanishi 18 yoshli Jamshid bilan o‘zaro janjallashgan. Oqibatda Husniddin O., Zuhriddin O., va Baxtiyor A. qo‘l-oyoqlari bilan Jamshidni tanasining turli joylariga urib tepib tan jarohati yetkazgan. Natijada Jamshid tan jarohatlari bilan Angren shahar markaziy shifoxonasining jonlantirish bo‘limiga yotqizilgan. Sud-tibbiy ekspertiza xulosasiga ko‘ra, Jamshid “og‘ir” tan jarohati olganligi aniqlangan. Holat yuzasidan Angren shahar IIB huzuridagi Tergov bo‘limi tomonidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan. Jinoyat ishi bo‘yicha Husniddin O., Zuhriddin O., va Baxtiyor A., gumon qilinuvchi tariqasida ishda ishtirok etishga jalb qilinganlar. Hozirda tergov harakatlari olib borilmoqda. Avvalroq Yangiyerda bir yigit uch kishi tomonidan ayovsiz kaltaklangani hamda Farg‘onada 2 nafar qiz tanishining singlisini ranjitgan qizni “samosud” qilgani haqida xabar qilingandi.