Ekologiya va atrof-muhitni muhofaza qilish davlat qo‘mitasi tomonidan 24-noyabr kuni daraxtlar va butalar qimmatbaho navlari kesilishining oldini olish bo‘yicha moratoriy davrida amalga oshirilayotgan ishlarga bag‘ishlangan matbuot anjumani o‘tkazildi, deya xabar bermoqda “Gazeta.uz”.
Qo‘mita raisining birinchi o‘rinbosari Narzulla Oblomuradov moratoriy mobaynida tabiatga 9 milliard 787 million 200 ming so‘m miqdorida zarar yetkazilganini qayd etgan.
“Moratoriy e’lon qilingach, 20-noyabr holatiga ko‘ra, ekologik tadbirlar natijasida 3897 ta qonunbuzarlik aniqlangan. Ularda 4 milliard 316 million so‘mdan ortiq jarima belgilangan. Shundan 2 milliard 757 million 400 ming so‘m undirildi. Mazkur holatlar yuzasidan tabiatga yetkazilgan zarar miqdori 9 milliard 787 million 200 ming so‘mni tashkil etgan va shundan, 2 milliard 942 million 400 ming so‘mi undirildi”, — deya ta’kidladi Narzulla Oblomuradov.
Ta’kidlanishicha, tabiatga yetkazilgan zararni undirish maqsadida 338 ta holat bo‘yicha (6 milliard 913 million 100 ming so‘m) to‘plangan hujjatlar sud, prokuratura, MIB, IIBga kiritilgan. 17 ta holat bo‘yicha qonunbuzarlik sodir etgan shaxslarga jinoiy ish qo‘zg‘atilgan. Huquqbuzarlardan 121 ta ish asbobi ashyoviy dalil sifatida olib qo‘yilgan.
Aniqlangan huquqbuzarliklar natijasida jami 2298 metr kub buta, 7854 tup daraxt, shundan 3307 dona qimmatli va 4547 dona kam qimmatli daraxtlar noqonuniy ravishda kesilgan. Huquqbuzarliklarning 167 tasi mansabdor shaxslar tomonidan sodir etilgan.
Xususan, Sirdaryo tumani hokimining o‘rinbosari 11,7 million so‘m hamda Yakkasaroy tumanida Vuildinig and Supplies qurilish korxonasi tomonidan 81 tup daraxtlar kesilganligi natijasida 630,4 million so‘m miqdorida tabiatga zarar yetkazilgan.Anjumanda qayd etilishicha, moratoriy davrida jismoniy va yuridik shaxslardan jami 4018 ta murojaat kelib tushgan. Ularda 188 943 tup davlat o‘rmon fondiga kirmaydigan daraxt va butalarning kesilishiga ruxsat so‘ralgan. Qo‘mita vakili jami 134 232 tup (71 foiz) daraxt va butalarning kesilishiga, shundan 65 105 tup sharq chinori, eman, Qrim qarag‘ayi, chinorsimon zarang, eldor qarag‘ayi, kashtan, shumtol, turang‘il va boshqa 20 turdan ortiq qimmatbaho daraxt va butalarning kesilishiga rad javobi berilganini aytdi.
Avvalroq Davlat ekologiya qo‘mitasi moratoriy muddatini 2021-yil 31-dekabrga qadar uzaytirish bo‘yicha Vazirlar Mahkamasiga taklif kiritgani xabar qilingandi.
Izoh (0)