Xalq ta’limi vazirligi prokuratura bilan hamkorlikda Andijon viloyatining Baliqchi tumanidagi asossiz o‘zlashtirilayotgan 3 ta maktab yerini qaytarib oldi. Bu haqida vazirlik matbuot xizmati xabar berdi.
Qayd etilishicha, Xalq ta’limi vazirligi maktab yerlari asossiz o‘zlashtirilishini oldini olish maqsadida maktab yer maydonlarini ta’lim muassasalari tasarrufiga qaytarish bo‘yicha Andijon viloyati prokuraturasiga murojaat bilan chiqqan.
Andijon viloyat prokuraturasi tomonidan mazkur holatlar o‘rganilib, Baliqchi tuman hokimligining qarori bilan tumandagi 10, 39 va 50-son umumiy o‘rta ta’lim maktablari hududidagi jami 73,4 sotix yer maydonlari Prezidentning “Xalq ta’lim tizimiga boshqaruvning yangi tamoyillarini joriy etish chora tadbirlari to‘g‘risida”gi qaroriga zid ravishda Xalq ta’limi vaziri bilan kelishuv amalga oshirilmasdan to‘g‘ridan-to‘g‘ri tuman zaxirasiga olinganligi aniqlangan.
Ushbu holat bo‘yicha Baliqchi tuman prokuraturasi tomonidan tuman hokimining qaroriga protest keltirish yo‘li bilan bekor qilinishi ta’minlangan.
Ma’lumot uchun, O‘zbekiston Prezidentining tegishli qarorlariga asosan umumta’lim va maktabdan tashqari muassasalarning yer uchastkalari va ko‘chmas mulkini O‘zbekiston xalq ta’limi vaziri bilan kelishmasdan turib begonalashtirish, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan ta’lim tashkilotlari va muassasalarning bino-inshootlari va yer uchastkalarini ta’lim sohasidan boshqa maqsadlarda yuridik va jismoniy shaxslarga berilishi qat’iyan taqiqlangan.
Izoh (0)