Andijonda korrupsiyaga yo‘l qo‘ygan 20 nafar bank mansabdori jinoiy javobgarlikka tortilgani ma’lum qilindi

Andijon viloyatida faoliyat olib borayotgan tijorat banklarining 20 nafar mansabdori korrupsiya va mansabdorlik jinoyatlari uchun javobgarlikka tortilgan. Bu haqda viloyat prokurori G‘ayrat Fozilov 23-noyabr kuni viloyat hokimligida bo‘lib o‘tgan idoralararo yig‘ilishda ma’lum qilgan.

Yig‘ilishda bank xizmatlarini ko‘rsatish, ayniqsa, kredit ajratishda suiiste’molchilik, tamagirlik va mablag‘larni talon-toroj qilish holatlari uchrayotganligi ta’kidlanib, bir qancha misollar keltirilgan.

“Raqamlarga e’tibor qaratadigan bo‘lsak, so‘nggi ikki yilda banklarning 20 nafar mansabdori korrupsiya va mansabdorlik jinoyatlari uchun javobgarlikka tortilgan. Ularning 8 nafari ‘Xalq banki’, 4 nafari ‘Agrobank’, 3 nafari ‘Mikrokreditbank’, 2 nafari ‘Milliybank’ va qolgan 3 nafari ‘Asakabank’, ‘Uzsanoatqurilishbank’ va ‘Hamkorbank’ xodimlaridir”, — deydi G‘ayrat Fozilov.

Ma’lum qilinishicha, “Xalq banki”ning Andijon filiali mansabdor shaxslari Sh.I., B.T., S.A., F.M., M.M. va boshqalar o‘z mansabidan foydalanib qator korrupsiyaviy jinoyatlarga qo‘l urgan. Ular o‘zaro jinoiy til biriktirib, 1,3 milliard so‘m kredit mablag‘ini bankdan noqonuniy ravishda chiqarib, o‘zlashtirish va rastrata qilish yo‘li bilan talon-toroj qilgan. Hozirda B.T. va uning sheriklari qamoqqa olingan.

Shuningdek, “Milliybank”ning Shahrixon filiali mansabdor shaxslari S.R. va Z.D. tomonidan 19 nafar fuqaro nomiga qalbaki hujjatlar tayyorlanib, ularning nomiga 378 million so‘m kredit olinib, shaxsiy manfaatlar uchun o‘zlashtirib yuborilgan.

Bundan tashqari “Har bir oila — tadbirkor” dasturi doirasida aholiga tarqatilishi lozim bo‘lgan 700 million so‘m imtiyozli kredit mablag‘lari ham bank mansabdor shaxslari tomonidan talon-toroj qilingan.

Kredit ajratish va uning sarflanishini monitoring qilish borasidagi suiiste’mollik va ko‘zbo‘yamachiliklar 15,5 milliard so‘m kredit mablag‘larining maqsadsiz ishlatilishiga olib kelgan.

“Aytib o‘tish joizki, banklar faoliyatiga turli aralashuvlarni cheklash maqsadida ularni tekshirish amaliyoti keskin qisqartirildi, ma’lumot almashishda ham bank siri to‘g‘risidagi qonunga qat’iy rioya qilinmoqda. Amalda esa buning aksi kuzatilmoqda. Markaziy bankning hududiy boshqarmasi qayd etilgan qonun buzilishi holatlariga loqayd munosabatda bo‘lmoqda. Jumladan, hududiy boshqarma tomonidan so‘nggi ikki yilda tijorat banklarining 4 ta filialida o‘tkazilgan tekshiruvlar natijasi bo‘yicha huquq-tartibot organlariga bironta ham material taqdim etilmagan. Vaholanki, ushbu davrda huquqni muhofaza qiluvchi idoralar bank mansabdor shaxslari tomonidan sodir etilgan 16 dan ortiq jinoyatni aniqlagan”, – dedi viloyat prokurori.