Vazirlar Mahkamasining 20-noyabr kuni “Ayrim turdagi mahsulotlarni majburiy raqamli markirovkalash tizimini joriy etish to‘g‘risida”gi 737-sonli qarori qabul qilindi, deb xabar beradi Norma.
Ro‘yxatdan tamaki mahsulotlari, alkogolli ichimliklar (pivodan tashqari), pivo mahsulotlari, dori vositalari va tibbiyot vositalari, suv va alkogolsiz ichimliklar, maishiy texnikalar o‘rin olgan.
Davlat soliq qo‘mitasiga quyidagilarni ishlab chiqish topshirildi:
- 2020-yil 10-dekabrga qadar alkogol va tamaki mahsulotlarini markirovkalash va kuzatish tartibi to‘g‘risidagi nizomni;
- 2021-yil 30-dekabrga qadar tajriba loyihasi yakunlariga ko‘ra boshqa tovarlarni markirovkalash va kuzatish tartibi to‘g‘risidagi nizomni.
Shuningdek, Davlat soliq qo‘mitasiga Axborot texnologiyalari va kommunikatsiyalarini rivojlantirish vazirligi bilan birgalikda 2020-yil 1-dekabrga qadar “Asl belgisi” mahsulotlarni markirovkalash va kuzatib borish milliy axborot tizimini (MAT) joriy qilish topshirilgan:
- ayrim turdagi mahsulotlarni majburiy markirovkalash sohasida DXSh loyihasi konsepsiyasini davlat-xususiy sheriklik sohasidagi vakolatli davlat organiga ko‘rib chiqish uchun bir hafta muddatda taqdim etish;
- ayrim tovar pozitsiyalarini markirovkalash yuzasidan joriy qilingan tajriba natijalarini hisobga olgan holda “Asl belgisi” MATni ishlab chiqish, undan foydalanish va unga texnik xizmat ko‘rsatish uchun “CPRT Turon” MChJ bilan birgalikda to‘g‘ridan to‘g‘ri muzokaralar asosida DXSh bitimini tuzish topshirildi.
Avvalroq O‘zbekistonda mahsulotlar tarkibidagi tuz, shakar va yog‘ni markirovkalash boshlangani to‘g‘risida xabar berilgandi.
Izoh (0)